محسن نقوی سے چینی سفیر کی ملاقات؛ چینی شہریوں کی سیکیورٹی پر تبادلہ خیال
لاہور: چین کے سفیر جیانگ زیڈونگ وزارت داخلہ پہنچے جہاں وفاقی وزیر داخلہ محسن نقوی نے چینی سفیر کا خیرمقدم کیا۔
وفاقی وزیر داخلہ محسن نقوی سے چینی سفیر کی ملاقات ہوئی جس میں وزیر اعظم پاکستان کے دورہ چین کی تیاریوں کے حوالے سے بات چیت کی گئی۔
ملاقات میں پاکستان بھر میں چینی شہریوں کی سیکیورٹی پر بھی تبادلہ خیال کیا گیا اور بشام واقعے پر ہونے والی پیش رفت پر بھی گفتگو کی گئی۔
ملاقات کے دوران چین کے سفیر نے وزارت داخلہ کا قلمدان سنبھالنے پر محسن نقوی کو مبارکباد پیش کی۔
اس موقع پر وفاقی وزیر محسن نقوی نے گفتگو کرتے ہوئے کہا کہ بشام واقعہ پاک چین دوستی پر حملہ تھا، ملوث عناصر کو ہر صورت عبرتناک انجام تک پہنچائیں گے، پاکستان بھر میں چینی شہریوں کی سکیورٹی کے لئے نئے ایس او پیز بنانے ہیں، ایس او پیز پر سختی سے عملدرآمد یقینی بنایا جا رہا ہے۔
انہوں نے کہا کہ لاہور اور کراچی میں چینی قونصلیٹ کا دورہ کیا اور قونصل جنرلز سے ملاقات کی، چینی قونصل جنرلز نے چینی شہریوں کی سیکیورٹی کے اقدامات پر اطمینان کا اظہار کیا۔
وزیر داخلہ نے مزید کہا کہ پاک چین دوستی کو سبوتاژ کرنے کوئی سازش کامیاب نہیں ہونے دیں گے، پاکستان اور چین کے درمیان برادرانہ تعلقات دہائیوں پر محیط ہے اور دشمن ان مضبوط تعلقات میں دراڑ نہیں ڈال سکتا۔
واضح رہے کہ وفاقی سیکریٹری داخلہ خرم آغا، چین کے سفارت خانے کے اعلیٰ حکام اور متعلقہ افسران بھی اس موقع پر موجود تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News