لاہور: پنجاب کے گورنر سلیم حیدر خان کی آج ہونے والی حلف برداری کی تقریب ملتوی کردی گئی ہے۔

اس حوالے سے پیپلز پارٹی پنجاب کے جنرل سیکریٹری سید حسن مرتضیٰ نے بتایا ہے کہ ناگزیر وجوہات کی بنیاد پر نئے گورنر پنجاب کی تقریب حلف برداری ملتوی کر دی گئی ہے، آئندہ تقریب حلف برداری 7 مئی شام چھ بجے ہوگی۔

واضح رہے کہ پیپلز پارٹی کے رہنما نامزد گورنر پنجاب سردار سلیم حیدر نے آج شام چھ بجے حلف اٹھانا تھا، چیف جسٹس لاہور ہائی کورٹ شہزاد خان نے نئے گورنر سے عہدے کا حلف لینا تھا۔

اس سے قبل وفاقی حکو مت نے نئے گورنر پنجاب کی تعیناتی کے لئے  اقدامات شروع کردیے تھے، سیکریٹری کیبنٹ ڈویژن کامران علی  افضل نے سردار سلیم حیدر خان کو گورنر پنجاب بنانے کے وفاقی حکومت کے فیصلے سے حکومت پنجاب کو باضابط آگاہ کر دیا تھا۔

سیکریٹری کیبنٹ ڈویژن نے چیف سیکریٹری کو سردار سلیم حیدر کو گورنر پنجاب نامزد ہونے کے بارے باقاعدہ خط لکھا تھا۔

بعدازاں سیکریٹری کیبنٹ ڈویژن کامران علی افضل نے چیف پنجاب زاہد اختر زمان کو سردار سلیم حیدر خان کی حلف برداری کے انتظامات کرنے کی ہدایت کردی تھی۔