اسلام آباد: وفاقی وزیر اطلاعات و نشریات عطاء اللہ تارڑ نے جعلی خبروں کے پھیلاؤ اور سوشل میڈیا کے غلط استعمال کو روکنے کے لیے عالمی سطح پر اقدامات کی ضرورت پر زور دیا ہے۔

عطاء اللہ تارڑ سے پاکستان کے دورہ پر آئے بنگلہ دیشی صحافیوں کے وفد کی ملاقات ہوئی جس میں پاکستان میں آزادی اظہار رائے اور حکومت کے معاشی اقدامات سمیت مختلف اہم امور پر تبادلہ خیال کیا گیا۔

ملاقات میں وفاقی وزیر عطاء تارڑ نے گفتگو کرتے ہوئے کہا کہ وزیراعظم شہباز شریف کی زیر قیادت حکومت کی پوری توجہ معاشی استحکام پر مرکوز ہے، موجودہ حکومت کے اقتدار میں آنے کے بعد معاشی اشاریئے مثبت ہو رہے ہیں، عالمی جریدے بھی پاکستانی معیشت میں بہتری کی پیشگوئی کر رہے ہیں۔

انہوں نے کہا کہ حکومت پاکستان میں انفراسٹرکچر کے منصوبوں میں سرمایہ کاری کے لئے بھی اقدامات اٹھا رہی ہے، یہ منصوبے نہ صرف معیشت کو فروغ دیں گے بلکہ روزگار کے مواقع بھی پیدا ہوں گے۔

عطاء تارڑ نے کہا کہ غیر ملکی سرمایہ کاری کو راغب کرنے اور سرمایہ کاروں کی سہولت کے لئے خصوصی سرمایہ کاری سہولت کونسل قائم کی جس کے نتائج آنا شروع ہو گئے ہیں۔

انکا کہنا تھا کہ وزیراعظم محمد شہباز شریف عوام کو ریلیف کی فراہمی کے لئے پرعزم ہیں، پاکستان میں ٹیکس نظام کو بہتر کیا جا رہا ہے، اس ضمن میں ایف بی آر میں ٹیکس اصلاحات لائی جا رہی ہیں۔

وفاقی وزیر نے کہا کہ حکومت پاکستان آزادی صحافت اور آزادی اظہار رائے کی اہمیت کو تسلیم کرتی ہے، صحافیوں کے حقوق کے تحفظ کے لئے پرعزم ہیں، سوشل میڈیا کے غلط استعمال اور جعلی خبروں کے پھیلاﺅ کے لئے عالمی سطح پر اقدامات کی ضرورت ہے۔

عطاء تارڑ نے مزید کہا کہ بنگلہ دیشی صحافیوں کے مشکور ہیں کہ وہ پاکستان پر آئے اور حکومت کے معاشی اقدامات کے بارے میں جاننے میں دلچسپی لی۔

دوسری جانب بنگلہ دیشی صحافیوں کے وفد نے پاکستان میں میزبانی اور تعاون کی فراہمی پر حکومت پاکستان، وزارت اطلاعات اور صحافتی اداروں کا شکریہ ادا کیا اور کہا کہ پاکستان کا دورہ کر کے بہت اچھا لگا، اس طرح کے دوروں سے دونوں ممالک کے درمیان تعلقات اور عوامی سطح پر روابط کو فروغ حاصل ہوگا۔

واضح رہے کہ بنگلہ دیشی صحافیوں کے وفد میں اقتدار احمد، مکرم حسین، ریاض احمد، شیخ ساجد، محمد عبدالودود، جبون احمد سارکار، قمر الزمان اور معین الحق شامل تھے۔

اس موقع پر ایگزیکٹو ڈائریکٹر جنرل ایکسٹرنل پبلسٹی ونگ عنبرین جان اور وزارت اطلاعات کے دیگر اعلیٰ افسران بھی موجود تھے۔