وزیر اعلیٰ پنجاب مریم نواز شریف کی زیر صدارت ایک خصوصی اجلاس ہوا جس میں انہوں نے کہا کہ پنجاب کے کاشتکار کو کھاد کی فراہمی ہر صورت یقینی بنائیں گے۔

مریم نواز شریف نے اجلاس کے دوران صوبے میں کھاد کی ضرورت اوردستیابی کی صورت حال کا جائزہ لیا اور کہا کہ کھاد کی ذخیرہ اندوزی اور اسمگلنگ روکنے میں کوتاہی بالکل برداشت نہیں کی جائے گی۔

وزیر اعلیٰ پنجاب نے یہ بھی کہا کہ ہرکاشتکار کے مفادات کا تحفظ کرینگے،استحصال کسی صورت قبول نہیں ہے جبکہ اجلاس میں کھاد کے نرخ میں کمی کے رحجان پر اطمینان کا اظہار کیا۔

مریم نواز نے ذخیرہ اندوزی اور غیر قانونی نقل و حمل روکنے کے لئے سخت اور موثر اقدامات کو یقینی بنانے کا حکم بھی دیا، جبکہ کاشتکاروں کوکھاد کی دستیابی کو یقینی بنانے کےلئے فول پروف طریقہ کار اختیار کرنے کی ضرورت پر زوردیا۔

وزیر اعلیٰ پنجاب نے پلانٹ سے ڈیلر تک کھاد کی فراہمی کی ڈیجٹل سپلائی مانیٹرنگ موثر بنانے کی ہدایت بھی جاری کی، اس کے علاوہ اجلاس میں پیسٹی سائیڈ اور فرٹیلائزر ایکٹ میں ترامیم کی سفارشات پر غور کیا گیا۔

مریم نواز نے کسان کارڈ پروگرام میں رجسٹریشن کے لئے اسپیشل ہیلپ لائن قائم کرنے کا اصولی فیصلہ بھی دیا۔

مریم نواز کو بریفننگ میں بتایا گیا کہ پنجاب میں یوریا کھاد کی ڈیمانڈ  اور پیداوار تقریباً 65لاکھ ٹن ہے، جبکہ ملکی پیداوار کا تقریباً 70 فیصد یوریا کھاد پنجاب میں ربیع اور خریف کی فصل کے لئے استعمال ہوتی ہے۔