وزیراعلیٰ سندھ مراد علی شاہ نے کہا ہے کہ کراچی میں دہشتگردی کے واقعات میں کمی آئی ہے، کراچی کے حالات اب بہتر ہیں۔

مراد علی شاہ نے اپنے جاری کردہ ایک بیان میں کہا کہ پیپلز پارٹی نے ہمیشہ جمہوریت کے تسلسل کیلئے قربانیاں دیں، شہید ذوالفقار علی بھٹو، شہید بینظیر بھٹو اور کارکنان نے قربانیاں دیں۔

انہوں نے کہا کہ پیپلز پارٹی کارکنان کی قربانیوں کی وجہ سے پارٹی زندہ ہے۔

ان کا کہنا تھا کہ ایک وقت تھا جب کراچی میں ٹارگٹ کلنگ ہوتی تھی، ہماری پولیس اور رینجرز نے کراچی میں امن قائم کیا، کراچی کے حالات اب بہتر ہیں، دہشت گردی کے واقعات میں بھی کمی آئی ہے۔

وزیراعلیٰ سندھ نے کہا کہ اسٹریٹ کرائم کے واقعات پر بھی جلد قابو پالیں گے۔

مراد علی شاہ نے کا کہنا تھا کہ نوکریوں کے سلسلے میں لیاری والوں کا خیال رکھا جارہا ہے، ہمارے نوجوان کسی سے بھی کم نہیں، لیاری کے نوجوان پولیس، رینجرز اور افواج میں جاکر ملک کی خدمت کریں گے۔

انہوں نے کہا کہ پولیس میں بھرتیوں کے سلسلے کو جلد شروع کیا جائے گا، پیپلز پارٹی کبھی بھی اپنے شہدا اور ورثا کو نہیں بھولے گی۔