شدید گرمی کی لہر کے باعث ملک بھر میں بجلی کے شارٹ فال میں مزید اضافہ ہوگیا ہے جو کہ آج  6 ہزار 70 میگاواٹ  تک پہنچ گیا۔

ذرائع کے مطابق ملک میں بجلی کی مجموعی طلب  26 ہزار میگاواٹ ہے جبکہ آج ملک میں بجلی کی پیداوار 19 ہزار 929 میگاواٹ ہے، طلب اور رسد میں فرق کے باعث شہری اور دیہی علاقوں میں لوڈشیڈنگ جاری ہے۔

پاور ڈویژن ذرائع کے مطابق شہری علاقوں میں شارٹ فال کے باعث لوڈشیڈنگ کا دورانیہ 6 گھنٹے، جبکہ دیہی علاقوں میں یہ دورانیہ 8 گھنٹے تک ہے، اس کے علاوہ لائن لاسز والے فیڈرز پر بجلی کی بندش کا دورانیہ 14 گھنٹے تک ہے۔

ذرائع کے مطابق پن بجلی ذرائع سے آج  6 ہزار 900 میگاواٹ بجلی پیدا ہورہی ہے، جبکہ سرکاری تھرمل پاور پلانٹس 700 میگاواٹ بجلی پیدا کررہے ہیں۔

نجی شعبے کے بجلی گھروں کی پیداوار 7 ہزار 988 میگاواٹ ہے، جبکہ ونڈ پاور پلانٹس سے 1000 میگاواٹ بجلی پیدا ہورہی ہے۔

ونڈ پاور پلانٹس سے 1000 میگاواٹ بجلی پیدا ہورہی ہے، جبکہ سولر پاور پلانٹس سے 199، بگاس سے 142 میگاواٹ اس کے علاوہ نیوکلئیر پاور پلانٹس سے 3 ہزار  میگاواٹ بجلی پیدا ہورہی ہے۔