اسلام آباد: پاکستان علماء کونسل کے چیئرمین علامہ طاہر محمود اشرفی نے کہا ہے کہ پاکستان کے اندرونی معاملات میں کسی بھی قسم کی مداخلت کسی صورت قابل قبول نہیں۔

علامہ طاہر محمود اشرفی نے اپنے جاری کردہ بیان میں کہا کہ پاکستان علماء کونسل امریکی کانگریس کی قرارداد کو مسترد کرتی ہے، امریکا کا اپنا دہرا معیار اور منافقانہ کردار اس طرح کی قرارداد کے قابل نہیں ہے۔

انہوں نے کہا کہ پاکستان میں انتخابات ہمارا اندرونی معاملہ ہے جسے پاکستان کی سیاسی و مذہبی جماعتوں اور عوام نے حل کرنا ہے، حکومت پاکستان کی طرف سے امریکی قرارداد کو مسترد کرنے اور اس پر قرارداد لانے کا فیصلہ درست سمت میں قدم ہے۔

چیئرمین علماء کونسل کا کہنا ہے کہ پارلیمان میں موجود پاکستان کی تمام سیاسی و مذہبی جماعتوں کے قائدین سے اپیل کرتے ہیں کہ امریکی قرارداد کے خلاف متفقہ طور پر قرارداد منظور کریں۔

طاہر اشرفی نے مزید کہا کہ پاکستان علماء کونسل کل خطبات جمعہ میں امریکی قرارداد کی مذمت کرے گی، پاکستان کے اندرونی معاملات میں کسی بھی قسم کی مداخلت کسی صورت قابل قبول نہیں ہو سکتی۔