وزیر اعظم شہباز شریف نے قطر کے امیر شیخ تمیم بن حمد الثانی کو عید الاضحیٰ کی مبارک باد پیش کی۔

 وزیر اعظم شہباز شریف کا عید الاضحیٰ کے پرمسرت موقع پر قطر کے امیر شیخ تمیم بن حمد الثانی سے ٹیلیفونک رابطہ کیا، جس کے دوران وزیراعظم نے حکومت اور عوام کی جانب سے امیر، حکومت قطر اور عوام کو تہہ دل سے عید الاضحیٰ کی مبارکباد پیش کی اور نیک خواہشات کا اظہارکیا۔

 اعلامیے کے مطابق دونوں رہنماؤں نے قربانی، ہمدردی اور اتحاد کی علامت عید الاضحیٰ کے تہوار کی اہمیت پر بات چیت کی جبکہ دونوں رہنماؤں نے فلسطین کے بہادر اور مظلوم عوام کی حالت زار پر بھی تبادلہء خیال کیا۔

دونوں رہنمائوں نے عالمی برادری سے مطالبہ کیا فلسطین کے حوالے سے امن کی بحالی کی کوششوں کو بڑھائے اور خطے میں تشدد اور خونریزی کا فوری خاتمہ یقینی بنایا جائے۔

ٹیلیفونک رابطے کے دوران  وزیراعظم اور امیر قطر نے پاکستان اور قطر کے درمیان دوستی اور بھائی چارے کے رشتے کو مزید مضبوط بنانے کا اعادہ کیا۔

دونوں رہنمائوں نے اتفاق کیا کہ پاکستان اور قطر کے درمیان تعلقات  مشترکہ اقدار اور باہمی احترام پر مبنی ہیں، جبکہ دو طرفہ تعلقات اور مختلف شعبوں میں تعاون کو مزید مضبوط بنانے کے طریقوں پر تبادلہ خیال کیا گیا۔

وزیراعظم نے  تجارت، سرمایہ کاری اور محنت کے شعبوں میں پاکستان کے لئے قطر کی حمایت اور تعاون کو سراہا، اس کے علاہ دونوں رہنماؤں نے خطے اور عالمی امن، استحکام اور خوشحالی کے فروغ کے لیے مل کر کام جاری رکھنے پر اتفاق کیا۔

وزیراعظم نے پاکستان کے سرکاری دورے کی دعوت قبول کرنے پر امیر قطر کا شکریہ ادا کیا اور کہا کہ ان کے دورہء پاکستان کی تاریخیں جلد طے کرلی جائیں گی۔