کراچی میں سمندر میں نہانے پر2 ماہ کے لیے پابندی عائد کر دی گئی ہے جس کا نوٹیفکیشن بھی جاری کردیا گیا ہے۔

کمشنر کراچی سید حسن نقوی نے سمندری لہروں میں تغیانی خطرناک حد تک بڑھنے کے پیش نظر دفعہ 144 کے تحت سمندر میں نہانے پر دو ماہ کے لیے پابندی عائد کردی ہے۔

کے ایم سی نے خط لکھ کر کمشنر کو آگاہ کیا کہ کراچی میں ساحل سمندر کے قریب بڑی اور خطرناک لہریں بن رہی ہیں جس کے نتیجے میں سمندر میں نہانے والوں کی جان کو خطرہ لاحق ہوسکتا ہے۔

کمشنر کراچی نے کرمنل پروسیجر کوڈ کی دفعہ 144 نافذ کرتے ہوئے سمندر میں نہانے پر دو ماہ کے لیے پابندی عائد کردی ہے، نوٹیفکیشن کے مطابق  پابندی اطلاق کراچی سمیت کینپ بیچ, مبارک ولیج اور سونیرہ بیچ پر 14جون سے 13 اگست 2024 تک ہوگا۔

 واضح رہے کہ سمندر میں جون اور جولائی کے مہینے میں اونچی اونچی لہریں بلند ہوتی ہیں اور اس دوران اسکولوں میں موسم گرما کی چھٹیوں کی وجہ سے شہریوں کی بڑی تعداد ساحل سمندر کا رخ کرتی ہے۔

نوٹیفکیشن کے مطابق متعلقہ پولیس ایس ایچ اوز کو خلاف ورزی کرنے والوں کے خلاف کیس داخل کرنے کے اختیارات دے دیئے گئے ہیں۔