اسلام آباد: وفاقی وزیر قانون اعظم نذیر تارڑ نے کہا ہے کہ پاکستان کی ترقی میں سکھ برادری کا اہم کردار ہے۔

اعظم نذیر تارڑ نے سکھ برادری سے پنجابی میں خطاب کرتے ہوئے کہا کہ امرتسر گولڈن ٹیمپل میں حضرت بابا فرید گنج شکر کے ہاتھ سے لگی اینٹ موجود ہے، گرو نانک جی نے ذات پات کا نظام ختم کیا۔

انہوں نے کہا کہ اگر ہم سب پیار محبت اور امن کا راستہ نہ چھوڑتے تو دنیا بہت خوبصورت ہوتی،  اللہ تعالیٰ ایک دوسرے کی مدد کرنے اور عیبوں پر پردہ ڈالنے کا حکم دیتا ہے۔

وفاقی وزیر کا کہا تھا کہ وزیراعظم شہباز شریف نے خاص طور پر سکھ کمیونٹی کو سلام اور پیار دینے کا کہا، پنجاب ہمارا بھی گھر ہے اور آپ کا بھی، حکومت پنجاب سکھ یاتریوں کو مزید سہولیات فراہم کرنے کے لئے کام کر رہی ہے۔

اعظم نذیر تارڑ نے کہا کہ سکھ جب بھی آئیں پاکستان کو اپنا گھر سمجھ کر تشریف  لائیں، پاکستان تمام سکھوں کا پہلا گھر ہے، قیام پاکستان کے بعد سے سکھوں کا استقبال ہمارے جذبات کا مظہر ہے۔

انہوں نے مزید کہا کہ مشرق بعید اور دیگر ممالک سے آنے والے سکھوں کا خیرمقدم کرتا ہوں، پرامن بقائے باہمی اسلام اور سکھ مذہب دونوں کا حصہ ہے، پاکستانی اور پنجابی ہونے کے ناطے میرا سکھ دوستوں سے کئی دہائیوں کا رشتہ ہے۔