وزیراعلیٰ پنجاب مریم نوازنے درختوں کی حفاظت کے لیے ایک بڑا اقدام اٹھاتے ہوئے ضلع خوشاب میں دفعہ 144 کا فوری نفاذ کردیا ہے۔

حکومت پنجاب نے خوشاب میں ”پھلائی“ اور ”کاہو“ کے درخت کاٹنے پر پابندی لگا دی ہے جبکہ نوٹیفکیشن کی کاپی بول نیوز نے حاصل کرلی۔

نوٹیفکیشن کے مطابق تمباکو کی بڑھتی ہوئی مانگ کے باعث پھلائی اور کاہو کے درختوں کو تیزی سے کاٹا جارہا تھا جبکہ درختوں کی کٹائی سے وادی سون کے ماحولیاتی نظام کو شدید خطرات لاحق ہیں اس کے علاوہ بڑے پیمانے پر درختوں کی کٹائی نشیبی علاقوں میں سیلابی ریلوں کے خطرات بڑھا رہی ہے۔

پابندی کا اطلاق ضلع خوشاب میں پھلائی اور کاہو کے درختوں کی کٹائی اورضلع سے باہر نقل و حمل پرہوگا، جبکہ محکمہ داخلہ پنجاب کے جاری کردہ نوٹیفیکیشن کے مطابق پابندی کا اطلاق 15 روز کیلئے ہوگا۔

حکومت پنجاب نے قدرتی ماحول، مقامی آبادی اور جنگلی حیات کے تحفظ کیلئے یہ فیصلہ کیا ہے جبکہ ڈپٹی کمشنر خوشاب نے دفعہ 144 کے نفاذ کی سفارش کی تھی۔

واضح رہے کہ خوشاب میں دفعہ 144 کا نفاذ منگل 9 جولائی تک کیا گیا ہے۔