پاکستان تحریک انصاف (پی ٹی آئی) کے رہنما شیر افضل مروت نے شبلی فراز سے پارٹی آفس اور سینیٹ میں قائد حزب اختلاف دونوں عہدوں سے مستعفی ہونے کا مطالبہ کردیا۔

گزشتہ روز پی ٹی آئی کے جنرل سیکریٹری عمر ایوب نے پارٹی عہدے سے استعفیٰ دے دیا اور ان کے استعفے پر ردعمل دیتے ہوئے پی ٹی آئی رہنما شیر افضل مروت نے ان کے فیصلے کا خیر مقدم کیا ہے۔

رکن قومی اسمبلی شیر افضل مروت نے اپنے بیان میں کہا کہ عمر ایوب کے سیکریٹری جنرل کا عہدہ چھوڑنے کے فیصلے کا خیرمقدم کرتا ہوں، پارٹی کے چند دیگر افراد کو بھی ان کی پیروی کرنی چاہیے۔

انہوں نے کہا کہ بانی پی ٹی آئی جیل میں ہیں اور مینڈیٹ کی بازیابی دور ہے، ہماری خواتین اور رہنما جیلوں میں بند ہیں۔

شیر افضل مروت نے مزید کہا کہ ہم عوام کو عظیم تحریک کیلئے متحرک کرنے میں ناکام رہے، شبلی فراز کے استعفے سے پارٹی قبضہ مافیا کے چنگل سے آزاد ہوگی۔