وزیر بلدیات سندھ سعید غنی نے عیدالاضحٰی اور مون سون بارشوں کے حوالے سے پلان مرتب کرنے کی ہدایت کر دی ہے۔

صوبائی وزیر سندھ سعید غنی کی زیر صدارت عیدالاضحٰی اور مون سون بارشوں کے حوالے سے اعلٰی سطحی اجلاس ہوا جس میں سعید غنی نے سندھ سولڈ ویسٹ مینجمنٹ بورڈ کی جانب سے کراچی کے لئے بنائے گئے پلانز پر عدم اعتماد کا اظہار کرتے ہوئے شدید برہمی کا اظہار کیا۔

سعید غنی نے کہا کہ پلان زمینی حقائق کو دیکھ کر مرتب کیا جائیں، جبکہ جس طرح مشینری مختلف اضلاع میں رکھی گئی ہیں وہ کسی صورت زمینی حقائق پر نہیں نظر آتی۔

وزیر بلدیات سندھ نے سندھ سولڈ ویسٹ مینجمنٹ کے ایم ڈی کو ہدایات دیتے ہوئے کہا کہ آئندہ 24 گھنٹوں کے اندر اندر مکمل پلان مرتب کرکے لایا جائے۔

سعید غنی نے کہا کہ تمام اضلاع کے کمیشنرز و ڈپٹی کمیشنرز اپنے اپنے اضلاع میں سرکاری افسران اور خصوصی طور پر منتخب عوامی نمائندوں کے ساتھ اجلاس منعقد کریں، اس کے علاوہ عیدالاضحٰی کے حوالے سے تیاریوں کو تمام منتخب عوامی نمائندوں کے ساتھ ملا کر پلانز کو حتمی شکل دی جائے۔

وزیر بلدیات نے یہ بھی کہا کہ جہاں جہاں سندھ سولڈ ویسٹ نہیں ہے ان علاقوں میں ڈپٹی کمیشنرز وہاں یونین کونسلز کی سطح پر اجلاس طلب کرکے عیدالاضحٰی کے پلانز کو حتمی شکل دی جائے۔

سعید غنی نے کہا کہ ہم ڈسٹرکٹ ایڈمنسٹریشن اور منتخب نمائندوں کے ساتھ مل کر اچھے نتائج حاصل کرسکتے ہیں۔

انہوں نے کہا کہ تمام میونسپل اسٹاف کی چھٹیاں منسوخ کردی گئی ہیں اس کے علاوہ تمام اضلاع کی ڈسٹرکٹ ایڈمنسٹریشن عیدالاضحٰی کے حوالے سے ڈمپنگ پوائنٹس،  آلائشوں کی نقل و حمل، اسپرے مہم سمیت دیگر پر مکمل نظر رکھیں۔

ایم ڈی سندھ سالڈ ویسٹ امتیاز شاہ نےکہا کہ کراچی میں عیدالاضحٰی کے دوران شہر میں 96 ہزار 782 میٹرک ٹن آلائشوں کے ساتھ 1 لاکھ 56 ہزار 350 میٹرک ٹن کچرے کو اٹھانے کے انتظامات کو یقینی بنایا جائے گا، جبکہ کراچی کے تمام اضلاع سمیت سندھ بھر میں جہاں جہاں سندھ سولڈ ویسٹ کام کررہی ہے وہاں وہاں آلائشوں کو ٹھکانے لگانے کے لئے انتظامات مکمل کرلئے ہیں۔

ایم ڈی سندھ سالڈ ویسٹ نے دوران اجلاس بتایا کہ کراچی کے تمام ٹاؤنز کے چیئرمین اور ایم سیز سے مکمل رابطے میں ہیں۔

سعید غنی نے کہا سندھ سولڈ ویسٹ مینجمنٹ بورڈ اس بات کو لازمی قرار دے کہ عیدالاضحٰی کے آپریشن کے دوران روزانہ کی سطح پر کچرے کو اٹھانے کے کام کو کسی صورت کم نہ کیا جائے، اس کے علاوہ سندھ سولڈ ویسٹ یوسی کی سطح پر گاڑیوں کی تعیناتی کرے اور اس بات کو واضح کیا جائے کہ گاڑیوں پر واضح طور پر مذکورہ یوسی کا نمبر نمایاں ہوں۔

وزیر بلدیات نے یہ بھی کہا کہ ایئرپورٹ کے اطراف گاربیج پوائنٹس کسی صورت نہ بنایا جائے، جبکہ اسپتال کے اطراف بھی کوشش کی جائے کہ وہاں بھی اس طرح کے کلیکشن پوائنٹس نہ بنائیں جائیں۔ ؎

سعید غنی نے کہا کہ ٹاﺅن چیئرمین کوشش کریں کہ تمام یوسیز کے چیئرمین کے ساتھ مل کر قربانیوں کی جگہ کو مختص کرنے کے لئے اقدامات کریں اور اس میں تمام مکتب فکر کے لوگوں کو شامل کیا جائے اس کے علاوہ کلیکشن پوائنٹس کا ایک وقت مقرر کریں کہ وہ شام کے اوقات سے قبل خالی کرکے وہاں پر صفائی کے انتظامات لازمی کیا جائے۔

وزیر بلدیات نے مزید یہ بھی کہا کہ آئی جی سندھ کو ڈمپنگ اور کلیکشن پوائنٹس پر پولیس کی تعیناتی کے لیے ایڈیشنل چیف سیکرٹری خط لکھیں اس کے علاوہ تمام کمیشنرز اپنے اپنے علاقوں میں سیکشن 144 ایک ہفتہ کے لئے لگائے۔

واضح رہے کہ اس اجلاس میں ایڈیشنل چیف سیکرٹری سندھ سید خالد حیدر شاہ،  ایم ڈی سولڈ ویسٹ امتیاز شاہ، میونسپل کمیشنر کے ایم سے، تمام ٹائونز کے چیئرمینز و میونسپل کمیشنرز،  ایم ڈی واٹربورڈ،  سندھ سولڈ ویسٹ کے تمام اضلاع کے ڈائریکٹرز و ڈپٹی ڈائریکٹرز، زوم پر صوبے بھر کے مئیرز، ڈپٹی مئیرز، کمیشنرز، ڈپٹی کمیشنرز، تمام اضلاع کے سندھ سولڈ ویسٹ کے اعلٰی افسران بھی شریک تھے۔