اسلام آباد: وفاقی وزیر توانائی اویس لغاری نے وفاقی وزیر داخلہ محسن نقوی کو خط لکھ کر خیبرپختونخوا گرڈ اسٹیشنز پر آنے والے واقعات پر مدد مانگ لی۔

وفاقی وزیر توانائی اویس لغاری نے وزیر داخلہ کو لکھے گئے خط میں کہا کہ ذمہ دار شخصیات گرڈ اسٹیشن کے احاطےمیں مظاہروں کی قیادت کررہی ہے، ایسے واقعات بجلی بندش پر مردان، چارسدہ، بنوں پشاور میں پیش آرہے ہیں۔

خط کے متن کے مطابق سی ای اوپیسکو کی طرف سے بھیجی گئی ایک رپورٹ شیئر کی جارہی ہے، صوبائی اراکین نے عملے کو بجلی بحالی سے متعلق غیرقانونی احکامات دیے، یہ صورتحال گرڈ اسٹیشن اور عملے کی حفاظت کیلئے خطرے کا باعث ہے۔

اویس لغاری نے خط میں کہا کہ پولیس ذمہ داروں کے خلاف ایف آئی آر کا اندراج نہیں کررہی، گرڈ اسٹیشن پر سخت سیکیورٹی فراہم کرنے کی ہدایت کی جائے اور غیر متعلقہ افراد کو گرڈز میں داخل ہونے سے روکا جائے۔

خط کے متن میں مزید کہا گیا کہ پیسکو اتھارٹی گرڈ اسٹیشن میں زبردستی داخل ہونے والے افراد پر مقدمےدرج کرے، پیسکو رپورٹ میں نامزد اسٹیشنز میں زبردستی داخل ہونے والوں پر مقدمے کیے جائیں۔