عالمی بینک نے پاکستان کے لیے 15 کروڑ ڈالر کی منظوری دے دی ہے۔

ترجمان عالمی بینک کے مطابق 15کروڑ ڈالر پنجاب میں لڑکوں اور لڑکیوں کی پرائمری تعلیم کے حوالے سے خرچ ہوں گے۔

اعلامیے کے مطابق پری پرائمری اور پرائمری اسکول کے لڑکوں اور لڑکیوں کی تعلیم اور گریڈز کی کی بہتری کے لیے رقم خرچ ہوگی، جبکہ معیاری تعلیم سمیت سیکھنے کے عمل کو بہتر کرنے میں مدد ملے گی۔

اعلامیے میں یہ بھی کہا گیا کہ اس منصوبے سے 50 لاکھ بچے، 7 ہزار  ہیڈ ماسٹرز اور ایک لاکھ 65 ہزار ٹیچرز براہ راست مستفید ہوں گے۔

اعلامیے میں کہا گیا کہ سرکاری اسکولوں کے تین ہزار ٹیچرز اور پنجاب ایجوکیشن فاؤنڈیشن کے ٹیچرز منصوبے سے مستفید ہوں گے، جبکہ پنجاب میں اسکولوں سے باہر 70 ہزار بچوں کو معیاری تعلیم کی فراہمی کے لیے یہ منصوبہ مددگار ثابت ہوگا۔

اعلامیے میں مزید یہ بھی کہا گیا کہ اس منصوبے سے پانچ ہزار 400 کلائمٹا اسمارٹ کلاس روم اور پرائمری اسکول بنائے جائیں گے، اس کے علاوہ اس رقم سے 2022 کے سیلاب میں متاثرہ پرائمری اسکولوں کی بحالی کا کام ہوگا۔