لاہور: وزیراعلیٰ پنجاب مریم نواز شریف نے مزدوروں کی فلاح و بہبود کیلئے اہم فیصلے کرلئے ہیں۔

وزیراعلیٰ مریم نواز کی زیر صدارت لیبر ڈیپارٹمنٹ کی کارکردگی کا جائزہ اجلاس ہوا جس میں تفصیلی بریفنگ دی گئی۔

اجلاس میں ورکرز اسکالرشپ پروگرام، لیبر کالونیوں کے قیام، مزدوروں کیلئے ہیلتھ فیسیلیٹی پراجیکٹس کا جائزہ لیا گیا۔

مریم نواز نے اجلاس میں ٹیکسلا اور سندر لیبر کالونیوں میں مزدوروں کے لئے 1224 فلیٹس بلا قیمت دینے کا اعلان کرتے ہوئے لیبر کے لئے 6-ارب روپے کی واجبات الادا ڈیتھ اور میرج گرانٹ ادا کرنے کا حکم دے دیا۔

وزیر اعلیٰ مریم نواز کی ہدایت پر گارمنٹ سٹی میں خواتین ورکرز کے لئے دو ہوسٹل بنانے کی بھی منظوری دے دی گئی۔

اجلاس میں بریفنگ دی گئی کہ گزشتہ دور حکومت میں 29 ہزار سے ورکرز کو ڈیتھ اور میرج ادا نہیں کی گئی تھی۔ شیخوپورہ میں 704 خواتین ورکرز کو مفت رہائش فراہم کی جائے گی۔

مریم نواز نے محکمہ لیبر میں اصلاحات، آکوپیشنل سیفٹی اینڈ ہیلتھ اور کم از کم اجرت کے قوانین پر عملدرآمد کا بھی حکم دیا اور کہا کہ پنجاب حکومت نے رواں بجٹ میں کم از کم اجرت 37 ہزار روپے مقرر کی ہے۔

انہوں نے کہا کہ پنجاب کے ہر مزدور کے حقوق کا تحفظ ہماری زمہ داری ہے، اسٹیک ہولڈرز کو فوری طور پر اعتماد میں لے کر کم از کم اجرت نافذ کی جائے، ہر ورکر کو پوری اجرت نہ ملنا تکلیف دہ امر ہے۔

وزیر اعلیٰ نے مزید کہا کہ ڈومیسٹک ورکرز پر لیر لاز کا نفاذ نہ ہونا افسوس ناک ہے، ورک پلیس پر سیفٹی پروٹوکول اور ایس او پیز پر عملدرآمد یقینی بنایا جائے اور سینیٹری اسٹاف کے لئے نالوں اور مین ہول کی صفائی کے دوران سیفٹی گیئر کا استعمال یقینی بنائیں۔

واضح رہے کہ سینئر منسٹر مریم اورنگزیب، صوبائی وزیر اطلاعات عظمیٰ زاہد بخاری،صوبائی وزیر لیبر اینڈ ہیومن ریسورس فیصل ایوب، ایم پی اے ثانیہ عاشق، چیف سیکریٹری زاہد اختر زمان، سیکریٹری لیبر، پرنسپل سیکریٹری ساجد ظفر ڈال اور دیگر حکام بھی اس موقع پر موجود تھے۔