اسلام آباد: حکومت کی طرف سے پاکستان تحریک انصاف (پی ٹی آئی) کی مخصوص نشستوں پر سپریم کورٹ کے فیصلے کو بے اثر کرنے کے لئے قانونی مسودہ لانے کی تیاری کی جارہی ہے۔

ذرائع کے مطابق سپریم کورٹ کی جانب سے پی ٹی آئی کو مخصوص نشستیں اور آزاد و سنی اتحاد کونسل کے اکثر ارکان کو پی ٹی آئی ارکان قرار دیئے جانے کے فیصلے کیخلاف حکومت نے سیاسی مورچہ بنانے کی تیاری کرلی ہے۔

نئے مجوزہ قانونی مسودے میں پی ٹی آئی ارکان قرار پانے والے ارکان کو بطور رکن پی ٹی آئی حلف اٹھانے یا قانونی شناخت سے روک دیئے جانے کی تیاریاں کی جارہی ہیں۔

قومی اسمبلی کے آج کے اجلاس کے ایجنڈے میں الیکشن ایکٹ 2024 میں دوسری ترمیم شامل کی گئی ہے۔

الیکشن کمیشن نے سپریم کورٹ کے فیصلے کی روشنی میں پی ٹی آئی کے 39 ارکان کو پی ٹی آئی رکن تسلیم کر کے نوٹیفکیشن جاری کردیا ہے۔

حکومت پی ٹی آئی کے ارکان کو حلف اور شناخت سے روکتی ہے تو سپریم کورٹ اور الیکشن کمیشن دونوں کے فیصلوں کی خلاف ورزی کی مرتکب ہوگی۔

پارلیمانی امور کے ماہرین تقسیم کا کہنا ہے کہ پی ٹی آئی ارکان کو نیا حلف اٹھانا ہوگا یا نہیں، نئے پی ٹی آئی ارکان قرار پانے والے ارکان کو دوباہ بطور رکن پی ٹی آئی حلف اٹھانے کی ضرورت نہیں ہوگی۔

ماہرین پارلیمانی امور نے کہا ہے کہ سنی اتحاد کونسل کے ارکان کی شناخت دستاویزات میں پی ٹی آئی ہوجائے گی نئے حلف کی ضرورت نہیں ہوگی، پی ٹی آئی ارکان نیا حلف لیں گے یا ان کو نئی جماعت کی شناخت ملے گی فیصلہ اسپیکر کریں گے۔

ذرائع نے مزید بتایا ہے کہ حکومت پارلیمان کی قانون سازی کے اختیار اور اسپیکر کی رولنگ چیلنج نہ کیے جانے کا بیانیہ بنائے گی۔