پاکستان رینجرز سندھ اور پولیس نے کشمور کچے کے علاقے میں بھیو گینگ کے خلاف آپریشن میں بڑی کامیابی حاصل کرلی۔

ترجمان سندھ رینجرز کے مطابق دوران آپریشن بھیو گینگ کی جانب سے اغواء کیے گئے 3 ہندو تاجر بازیاب ہوئے۔

ترجمان نے بتایا کہ بدنام زمانہ خطرناک انعامی یافتہ ڈاکو امداد عرف امدو بھیو اپنے بھائی نظیر عرف موالی عرف میانداد سمیت ہلاک ہوگیا جبکہ 5 ساتھی زخمی ہوئے۔

ترجمان کا کہنا تھا کہ ہلاک ڈاکو، غوثپور کے تین اغوا شدہ ھندو کمیونٹی سے تعلق رکھنے والے افراد کے اغوا اور پانچ بینک ملازمین کے اغوا کا ماسٹر مائینڈ تھا، ہلاک ڈاکو پر 50 کے قریب اور بھائی پر 25 اغوا کاری، پولیس مقابلے، پولیس پکٹ پر حملہ، ڈکیتی، قتل اور دیگر سنگین نوعیت کے جرائم کے کیسز تھے۔

سندھ رینجرز کے ترجمان نے کہا کہ امداد بھیو کی لاش سول ہسپتال کندھ کوٹ منتقلی کے موقع پر شہریوں کی جانب سے پاکستان رینجرز (سندھ) اور پولیس اہلکاروں کا پرجوش استقبال کیا گیا۔

ترجمان سندھ رینجرز کے مطابق شہریوں کی جانب سے جاری آپریشن کی کامیابیوں پر  رینجرز اور پولیس نے خیر مقدم اور جوانوں کے حق میں نعرے بازی کی۔

واضح رہے کہ فرار شدہ زخمی ڈاکوؤں کی تلاش کے لیے سرچ آپریشن جاری ہے۔