پاکستانی ایئر فورس کے پائلٹس ففتھ جنریشن فائٹر جیٹ اڑانے کے لیے تیار ہیں۔

ذرائع کے مطابق ففتھ جنریشن فائٹر جیٹ کی دوڑ میں پاکستان ایئر فورس کی حریفوں پر واضح برتری برقرار ، جبکہ پاکستانی ایئر فورس جنوبی ایشیا میں ففت جنریشن فائٹر جیٹ اڑانے والی پہلی فضائی قوت ہوگی۔

ذرائع نے بتایا کہ پاکستان ایئر فورس میں چینی ساختہ ففتھ جنریشن فائٹر جیٹ ایف سی 31 کی شمولیت کے لیے تیاریاں جاری ہیں، جبکہ پاکستانی ایئر فورس کے پائلٹس ففتھ جنریشن فائٹر جیٹ اڑانے کے لیے تیارہیں، جنہیں چین میں تربیت جاری ہے۔

ذرائع کے مطابق پاک فضائیہ بیک وقت 2 ففتھ جنریشن اسٹیلتھ فائٹر جیٹس کی اپنے بیڑے میں شمولیت پر کام کر رہی ہے، ایف سی 31 یا جے 31 پاکستان ایئر فورس میں شامل ہونے والا پہلا ففتھ جنریشن فائٹر جیٹ ہوگا۔

ذرائع نے بتایا کہ ایف سی 31 طیاروں کی آئندہ برس پاکستان ایئر فورس میں شمولیت کو یقینی بنانے کے لیے بھرپور تیاریاں جاری ہیں، جبکہ پاک فضائیہ ایف سی 31 طیاروں کو بطور ملٹی رول فائٹر جیٹ استعمال کرے گی۔

ذرائع کے مطابق ایف سی 31 سنگل سیٹ 2 انجن والا میڈیم سائز فائٹر جیٹ سمجھا جاتا ہے، پاکستان پہلے ہی چین کے تعاون سے جے ایف 17 تھنڈر طیارے کامیابی سے بنا رہا ہے۔

ذرائع نے بتایا کہ پاکستان ایئر فورس میں جدید ترین ملٹی رول 4.5 جنریشن چینی ساختہ جے 10 سی بھی بہترین انداز میں انٹیگریٹ کیے جا چکے ہیں، اس کے علاوہ پاکستان ایئر فورس کو ایف سی 31 جیسا جدید ترین اسٹیلتھ فائٹر جیٹ اپنے بیڑے اور کومبیٹ سسٹم میں انٹیگریٹ کرنے میں کوئی دشواری نہیں ہوگی۔

ایف سی 31 کی شمولیت سے پاک فضائیہ کو اپنے حریف پر جنریشنل گیپ کی صورت میں برتری حاصل ہوگی، بھارتی فضائیہ میں فی الحال کسی بھی ففتھ جنریشن اسٹیلتھ فائٹر جیٹ کی شمولیت کا آئندہ کئی برس تک کوئی امکان نہیں، جبکہ بھارتی فضائیہ کا تیجس پراجیکٹ بھی بے یقینی کی صورتحال کا شکار ہے۔

 واضح رہے کہ چین کی پی ایل اے نیوی ایف سی تھرٹی ون کے نیول ورژن کو اپنے جدید ترین ائیر کرافٹ کیرئیر پر متعین کرنے کا ارادہ رکھتی ہے۔