اسلام آباد: پاکستان تحریک انصاف (پی ٹی آئی) اور سنی اتحاد کونسل کی پارلیمانی پارٹی کا مشترکہ اجلاس ختم ہوگیا۔

پی ٹی آئی اور سنی اتحاد کونسل کی مشترکہ پارلیمانی پارٹی کا اہم ترین اجلاس پارلیمنٹ ہاؤس میں ہوا جس میں بیرسٹر گوہر علی خان، عمر ایوب خان، شبلی فراز، صاحبزادہ حامد رضا اور شیخ وقاص اکرم نے شریت کی۔

اس کے علاوہ علی محمد خان، عاطف خان، خاندانہ گلزار، عون پبی، محسن عزیز، فیصل سلیم اور ہمایوں مہمند بھی اجلاس میں موجود تھے۔

ذرائع کے مطابق اجلاس میں مخصوص نشستوں کے حوالے سے سپریم کورٹ کے فیصلے پر مشاورت کی گئی جبکہ پی ٹی آئی کے رہنماؤں اور ورکرز کی گرفتاریاں پر بھی بات چیت ہوئی۔

ذرائع نے مزید بتایا کہ اجلاس میں عدالتوں میں زیر سماعت کیسز پر بھی مشاورت ہوئی جبکہ اجلاس کے بعد پی ٹی آئی رہنما پارلیمنٹ ہاؤس کے باہر پیدل مارچ بھی کیا۔

قبل ازیں چیئرمین پی ٹی آئی بیرسٹر گوہر نے پارلیمنٹ ہاؤس کے باہر میڈیا سے گفتگو کرتے ہوئے کہا تھا کہ پارلیمانی پارٹی میں ایڈہاک ججز کے معاملے پر گفتگو کریں گے، ایڈہاک ججز کا مقصد سپریم کورٹ فیصلے پر اثر انداز ہونا ہے۔

انہوں نے کہا کہ پی ٹی آئی پر پابندی کے حکومتی فیصلے کا جواب دیں گے، عوام کی طاقت کے سامنے کوئی چیز نہیں ٹھہر سکتی۔

بیرسٹر گوہر نے مزید کہا تھا کہ 8 فروری کے بعد سب بدل چکا ہے، تحریک انصاف ہو گی اور اسی ایوان میں ہوگی۔