راولپنڈی: ترجمان جماعت اسلامی نے عوام کو ریلیف دیے بغیر دھرنا ختم نہ کرنے کا اعلان کردیا۔

امیرجماعت اسلامی حافظ نعیم الرحمان کی زیرصدارت دھرنے کے مقام پر اجلاس ہوا جس میں مرکزی اورصوبائی ذمہ داران نے شرکت کی۔

اجلاس میں 8 اگست کو مری روڈ پر مارچ کی تیاریوں کا جائزہ لیا گیا، مذاکراتی کمیٹی کے سربراہ لیاقت بلوچ نے رپورٹ پیش کی۔

خیال رہے کہ گذشتہ رات حکومتی کمیٹی سے مذاکرات کا تیسرا راؤنڈ ہوا تھا، آج جماعت اسلامی اور حکومتی کمیٹی کے درمیان مذاکرات کے چوتھے راؤنڈ کا امکان ہے۔

ترجمان جماعت اسلامی کے مطابق جماعت اسلامی اپنے 7 عوامی مطالبات تسلیم کروائے گی اور عوام کو ریلیف دیے بغیر یہ دھرنا ختم نہیں ہوگا۔

ترجمان نے بتایا کہ حافظ نعیم الرحمان 11 اگست کو لاہور میں وزیراعلیٰ ہاؤس کے سامنے خطاب کریں گے، 12 اگست کو امیرجماعت اسلامی پشاور میں جلسے سے خطاب کریں گے۔

ترجمان نے مزید کہا کہ حافظ نعیم الرحمان 14 اگست کو راولپنڈی میں جشن آزادی کے جلسے سے خطاب کریں گے جب کہ 16 اگست کو ملتان میں دھرنے سے خطاب کریں گے، بڑے شہروں کی اہم جگہوں پر اسکرینز کا اہتمام کیا جائے گا۔