وزیراعلیٰ پنجاب مریم نواز کے سیف سٹی نے ورچوئل ویمن پولیس اسٹیشن کی 100 دنوں کی کارکردگی رپورٹ جاری کر دی ہے۔

جاری کردہ رپورٹ کے مطابق لاہور سمیت پنجاب بھر سے 60 ہزار سے زائد خواتین کی شکایات موصول ہوئیں، 4  ہزار 143 کیسز میں تفتیش کا عمل جاری ہے جبکہ 1ہزار 137 کیسز کو جلد مکمل کرنے کی ہدایات دی گئیں ہیں۔

رپورٹ میں بتایا گیا کہ خواتین کی شکایت پر 4 ہزار 83 کیسز کی ایف آئی آر درج کروائی گئیں، گھریلو جھگڑوں پر 935 اور ہراسمنٹ کی 309، اس کے علاوہ خواتین سے زیادتی کی 460، اقدام قتل 157، تیزاب گردی کی 9 اور دیگر وجوہات کی 2 ہزار 292 ایف آئی آر درج کروائیں گئیں، جبکہ کل کیسز میں سے 51 ہزار 768 کیسز کو صلح یا دیگر وجوہات کی بنا پر ختم کر دیا گیا۔

ترجمان سیف سٹیز کے مطابق خواتین ورچوئل ویمن پولیس اسٹیشن سے روزانہ کی بنیاد پر راہنمائی حاصل کر رہی ہیں، اس کے علاوہ خواتین کو ایف آئی آر کے اندراج سے انویسٹی گیشن اور ٹرائل کے تمام مراحل میں راہنمائی فراہم  کی جا رہی ہے۔

 ترجمان سیف سٹیزنے بتایا کہ خواتین کسی بھی وقت 15 پر کال، ویمن سیفٹی ایپ لائیو چیٹ فیچر، ویڈیو کال فیچر کے ذریعے ورچوئل ویمن پولیس اسٹیشن سے رابطہ کر سکتی ہیں، جبکہ خواتین نام اور پتہ ظاہر کیے بغیر مکمل رازداری اور اعتماد کے ساتھ اپنا مسئلے کے حوالے شکایت درج  کروا سکتی ہیں۔