لاہور: وفاقی وزیرداخلہ محسن نقوی سے چینی قونصل جنرل ژاو شیرین کی سربراہی میں چینی بزنس کمیونٹی کے نمائندہ وفد کی ملاقات ہوئی جس میں چینی شہریوں اور پراجیکٹس پر کام کرنے والے عملے کی حفاظت کے اقدامات پر تفصیلی تبادلہ خیال لیا گیا۔

ملاقات میں چینی بزنس مینوں نے سیکیورٹی پلان کے حوالے سے تجاویز دیں جس کے بعد محسن نقوی نے چینی بزنس مینوں کی سفارشات کو نوٹ کیا اور قابل عمل تجاویز پر عملدرآمد کی یقین دہانی کرائی۔

وزیر داخلہ محسن نقوی نے گفتگو کرتے ہوئے کہا کہ چینی شہریوں کی حفاظت اولین ترجیح ہے، چینی شہریوں کو کاروبار کے لئے ہر ممکن سہولت دیں گے۔

انہوں ںے کہا کہ سیکیورٹی پلان کے ایس او پیز چینی شہریوں کے تحفظ کے لئے بنائے ہیں، چینی شہریوں کی سہولت کیلئے جو کچھ ممکن ہوا، وہ ضرور اقدام اٹھائیں گے۔

وفاقی وزیر نے مزید کہا کہ 14 اگست سے چینی شہریوں کے لئے ویزا آن لائن ہو جائے گا، اس سے چینی بزنس مینوں کو پاکستان آنے میں بہت آسانی ہو گی، چینی شہریوں کی آسانی کے لئے ایس او پیز کا جائزہ لیا جائے گا، چینی بزنس مینوں کی  تجاویز کو نوٹ کر لیا ہے، جلد اس پر آپ کو پیش رفت نظر آئے گی۔

دوسری جانب چینی قونصل جنرل ژاو شیرین نے کہا کہ پاکستان اور چین کے درمیان مثالی تعلقات ہیں، وفاقی وزیرداخلہ محسن نقوی میرے اور چین کے دوست ہیں، امید ہے کہ اس میٹنگ کے مثبت نتائج سامنے آئیں گے۔

3 گھنٹے طویل مشاورتی ملاقات میں وفاق اور پنجاب حکومت کے قانون نافذ کرنے والے اداروں کے اعلیٰ حکام اور پنجاب خصوصا پنجاب میں کاروبار کرنے والے چینی بزنس مینوں کی بڑی تعداد نے بھی شرکت کی۔

علاوہ ازیں وفاقی سیکریٹری داخلہ خرم علی آغا۔ انسپکٹرجنرل پولیس پنجاب ڈاکٹر عثمان انور، نیکٹا کے سربراہ رائے طاہر، سی سی بی او لاہور بلال صدیق کمیانہ، سیکریٹری داخلہ پنجاب نورالامین مینگل اور اعلیٰ افسران بھی اس موقع پر موجود تھے۔