اسلام آباد: پاکستان کی سائبر سیکیورٹی کو یقینی بنانے کے لیے پی ٹی اے نے اہم اقدام اٹھالیا ہے۔

ذرائع کے مطابق پی ٹی اے کی ہدایت پر ٹیلی کام آپریٹرز کا سائبر سیکیورٹی آڈٹ شروع کردیا گیا ہے، عالمی معیار کی کمپنیوں سے کرائے جانے والے سائبرسیکیورٹی آڈٹ کا حتمی جائزہ پی ٹی اے لے گا۔

ذرائع پی ٹی اے کا کہنا ہے کہ ٹیلی کام آپریٹرز کی سائبرسیکیورٹی کا تمام تکنیکی پہلوؤں سے جائزہ لیا جائے گا، ٹیلی کام کمپنیوں کی جانب سے پی ٹی اے کے سائبر سیکیورٹی فریم ورک پر عمل درآمد کی صورتحال کا بھی جائزہ لیا جائے گا۔

ذرائع نے بتایا کہ سائبر سیکیورٹی فریم ورک کے تحت یہ جائزہ بھی لیا جائے گا کہ فائروال لگی ہے یا نہیں، ٹیلی کام آپریٹرز کے اسٹاف کی سیکیورٹی کلیئرنس بھی دیکھی جائے گی۔

ذرائع پی ٹی اے نے مزید کہا کہ ٹیلی کام آپریٹرز سے صارفین کا ڈیٹا لیک نہ ہونے کا بھی جائزہ لیا جائے گا، ٹیلی کام آپریٹرز کا سائبر سیکیورٹی آڈٹ مکمل ہونے کےُ بعد پی ٹی اے اس پر اپنی فائینڈنگ دے گا۔