سندھ کے سینئر وزیرشرجیل انعام میمن کی زیرصدارت اعلیٰ سطح کا اجلاس ہوا، جس میں محکمہ ٹرانسپورٹ اور کمرشل گاڑیوں کی ڈجیٹلائزیشن اورآٹومیشن کا فیصلہ کیا گیا۔

شرجیل انعام میمن نے اجلاس میں کہا کہ محکمہ ٹرانسپورٹ اور ذیلی اداروں ایس ایم ٹی اے، پی ٹی اے، آر ٹی اے اور ٹرانس کراچی کی بھی ڈجیٹلائزیشن کا کام شروع کردیا گیا ہے، اس کے علاوہ محکمہ ٹرانسپورٹ کے سافٹ ویئرسے پی ٹی ایز کو آپس میں جوڑا جا رہا ہے، بین الصوبائی روٹ پرمٹس  کا بھی پتہ چل سکے گا۔

 شرجیل انعام میمن نےکہا کہ روٹ پرمٹس کی اجراع اوررینیوئل کے نظام کو آن لائن کیا جا رہا ہے، جبکہ ڈجیٹلائزیشن سے ٹرانسپورٹر حضرات آن لائن روٹ پرمٹس اپلائی اور ری نیو کروا سکیں گے۔

شرجیل انعام میمن نےکہا کہ روٹ پرمٹس، فٹنس سرٹیفکیٹ، باڈی میکرز کے پرمٹ کے اجراع کو  آسان بنانے کے لئے آن لائن کیا جا رہا ہے، اس کے علاوہ عوامی شکایتی مرکز بھی قائم کیا جائے گا، سیکریٹریٹ میں تمام معلومات اکٹھی کی جائے گی۔

سینئر وزیرشرجیل انعام میمن کی جانب سے آٹومیشن کے نظام پرہرپندرہ دن میں پیش رفت اور رپورٹ دینے کی ہدایات دی گئی۔

شرجیل انعام میمن نے کہا کہ ٹرانسپورٹ کے نظام کو آن لائن کرنے سے روینیو میں اضافہ ہوگا،    جدید ٹیکنالوجی کے استعمال سے نظام میں شفافیت آئے گی، پہلے مرحلے میں گاڑیوں کی فٹنس سرٹیفکیٹ کے نظام کو آن لائن  کیا جا رہا ہے، اس کے علاوہ ڈجیٹلائزیشن سے حادثات میں بھی کمی آئے  گی، مسافر محفوظ طریقے سے سفر کر سکیں گے۔