اسلام آباد: وزیراعظم محمد شہباز شریف نے غزہ میں اسکول پر اسرائیل کے وحشیانہ حملے کی مذمت کردی۔

وزیراعظم شہباز شریف نے غزہ میں اسکول پر ہونے والے حملے میں شہید ہونے والوں کے درجات کے بلندی کی دعا کی اور خاندانوں سے اظہار تعزیت کیا۔

وزیر اعظم شہباز شریف نے کہا کہ اسرائیل نے اپنی سفاکانہ کارروائیوں کی تمام  حدیں پار کردیں، اسکول کے بچوں پر حملہ کھلی جارحیت ہے، اس طرح کی بربریت کی مثال تاریخ میں نہیں ملتی۔

وزیر اعظم نے کہا کہ عالمی برادری بشمول اقوام متحدہ اسرائیل کی سفاکیت کو روکنے کے لئے عملی اقدامات کرے۔ ہم ایک بار پھر اپنا مطالبہ دہراتے ہیں کہ فلسطینیوں کی نسل کشی اور جنگی جرائم پر اسرائیلی قیادت اور سیکیورٹی فورسز کو انصاف کے کٹہرے میں کھڑا کیا جائے۔

شہباز شریف کہتے ہیں کہ اسرائیل کو اس کی ظالمانہ کارروائیوں کی کڑی سزا دی جائے، اسرائیل کے خلاف عالمی عدالت انصاف کے فیصلے پر عمل درآمد کرایا جائے۔

وزیراعظم نے مزید کہا کہ پاکستان ہر محاذ پر اپنے فلسطینی بہنوں اور بھائیوں کی اخلاقی و سفارتی حمایت جاری رکھے گا۔