لاہور: اولمپکس مقابلوں میں گولڈ میڈل جیتنے والے ارشد ندیم کی وجہ سے گاڑیوں کے یونیورسل نمبر پلیٹس جاری کرنے کا فیصلہ کیا گیا ہے۔

پنجاب حکومت نے بڑا فیصلہ کرتے ہوئے گاڑیوں کے یونیورسل نمبر پلیٹس جاری کرنے کا فیصلہ کیا ہے جب کہ محکمہ ایکسائز ٹیکسیشن پنجاب نے ورکنگ شروع کردی ہے۔

چند روز قبل وزیر اعلیٰ کی جانب سے ارشد ندیم کے لئے گاڑی کا تحفہ دیا گیا تھا، ارشد ندیم کو پاک 92.97 نمبر کی نمبر پلیٹ جاری کی جائے گی۔

وزیر اعلیٰ کی خصوصی ہدایت پر ارشد ندیم کی گاڑی کے لئے اسپیشل نمبر تیار کیا گیا ہے جس کے بعد فیصلہ کیا گیا کہ آئندہ عام شہری بھی یونیورسل طرز پر نمبر پلیٹ حاصل کرسکیں گے۔

بیرون ممالک کی طرز پر پنجاب میں پہلی مرتبہ گاڑیوں کے لئے یونیورسل نمبر پلیٹس کا اجراء کیا جائے گا، یونیورسل نمبر میں شہری اپنے نام یا کسی بھی خاص نام کی نمبر پلیٹس بنوا سکیں گے۔

گاڑی فروخت کرتے وقت اصل مالک اپنی نمبر پلیٹ اتار لے گا، بعد ازاں گاڑی کو محکمہ ایکسائز ٹیکسیشن کی جانب  سے دوبارہ نمبر جاری کیا جاسکے گا۔

ذرائع محکمہ ایکسائز کا کہنا ہے کہ ارشد ندیم کی گاڑی کی رجسٹریشن کے بعد عام شہریوں کے لئے بھی اس سہولت کا جلد آغاز کردیا جائے گا۔