وفاقی حکومت نے ارشد ندیم سمیت سول ایوارڈز حاصل کرنے والوں کی فہرست جاری کر دی ہے۔

کابینہ ڈویژن نے مختلف شعبوں میں پاکستان سول ایوارڈز حاصل کرنے والی شخصیات کی فہرست جاری کر دی ہے جس کے مطابق سابق وزیراعظم شہید ذوالفقارعلی بھٹو کو نشان پاکستان سے نوازنے کا فیصلہ کیا گیا ہے، اس کے علاوہ شاعر ناصر کاظمی کو نشان امتیاز عطا کیا جائے گا۔

شہزادہ عبد العزیز بین سلمان کو ہلال پاکستان، جبکہ دس پاکستانیوں کو ہلال شجاعت سے نوازا جائے گا۔

کابینہ ڈویژن کے مطابق اولمپک گولڈ میڈلسٹ ارشد ندیم کو ہلال امتیاز، مراد سدپارہ مرحوم کو ستارہ امتیاز سے نوازنے کا فیصلہ کیا گیا ہے، جبکہ14 غیر ملکی شخصیات کو بھی پاکستان سول ایوارڈز سے نوازا جائے گا۔

ادب کے شعبے میں 7، طب کے شعبے میں 4 جبکہ کھیلوں کے شعبے میں 5 شخصیات کو ایوارڈ عطا کئے جائیں گے، اس کے علاوہ تعلیم کے شعبے میں 8، سائنس کے شعبے میں 1 جبکہ پبلک سروس کے شعبے میں 27 شخصیات کو سول ایوارڈز عطا کیے جائیں گیں۔