اسلام آباد: عالمی مالیاتی فنڈ (آئی ایم ایف) سے 7 ارب ڈالر کے بیل آوٹ پیکیج کی حتمی منظوری کا معاملے پر آئی ایم ایف کے ایگزیکٹو بورڈ کا 6 ستمبر تک کا شیڈول بھی جاری کر دیا گیا۔

آئی ایم ایف کے ایگزیکٹو بورڈ کے اجلاس میں ویتنام، یوگینڈا اور ڈنمارک سمیت 7 ملکوں کا ایجنڈا شامل ہیں جبکہ پاکستان کا نام اب بھی آئی ایم ایف ایگزیکٹو بورڈ اجلاس میں شامل نہیں۔

ذرائع وزارت خزانہ کے مطابق پیشگی شرائط پوری ہونے کے بعد پاکستان سے متعلق بورڈ میٹنگ بلائے جانے کا امکان ہے، تاہم حکومت 2 ارب ڈالر کی اضافی ایکسٹرنل فنانسنگ کی شرط جلد پوری کرنے کیلئے پر امید ہے۔

وزارت خزانہ کے حکام نے بتایا ہے کہ سعودی عرب، چین، یو اے ای سے 12 ارب ڈالر قرض روول اوور کروانے کیلئے بھی رابطوں میں تیزی آگئی ہے، پاکستان کے ذمہ سعودی عرب کا 5 ارب ڈالر، چین 4 ارب ڈالر اور عرب امارات کا 3 ارب ڈالر واجب الادا ہے۔

حکام نے مزید کہا کہ پاکستان سعودی عرب سے ادھار تیل کی سہولت اور سرمایہ کاری کا خواہاں ہے جبکہ عالمی مالیاتی اداروں، دوطرفہ ممالک اور کمرشل بینکوں سے قرض لینے کی کوششیں جاری ہے۔

واضح رہے کہ پاکستان اور آئی ایم ایف کے درمیان اسٹاف لیول معائدہ 12 جولائی کو ہوا تھا۔