اسلام آباد: یوٹیلٹی اسٹورز کارپوریشن کے ملازمین کا اپنے ادارے کی بندش کیخلاف احتجاجی دھرنا آج آٹھویں روز بھی جاری ہے۔

ملک کے کونے کونے سے آئے ملازمین کی بڑی تعداد احتجاجی دھرنے میں شریک ہیں، تاہم وفاقی حکومت اور کارپوریشن رہنماؤں کے مابین مذاکرات کا آج فائنل راؤنڈ متوقع ہے۔

ملازمین کا کہنا ہے کہ ہمارے ادارے کی بندش کے احکامات فوری واپس لئے جائیں، ملازمین کا معاشی قتل بند کیا جائے اور ہمارے گھر کا چولہا جلنے دیں، اگر حکومت کوئی فیصلہ نہیں کرتی تو ہم ڈی چوک اور پارلیمنٹ ہاؤس کے سامنے دھرنا دیں گے۔

اس سے قبل ملازمین نے کہا تھا کہ مطالبات کی منظوری تک احتجاج جاری رکھیں گے، یوٹیلیٹی اسٹور بند کر کے ہمارا روزگار چھینا جارہا ہے، اس مہنگائی میں گزارا مشکل ہے تو بندش کے بعد گزر بسر کیسے کریں گے؟