وفاقی وزیر تجارت جام کمال خان نے کہا کہ پاکستانی برآمدات کے فروغ کے لیے 8.5 ارب روپے کی منظوری دی گئی ہے۔

جام کمال خان نے اپنے بیان میں کہا کہ ٹیکسٹائل، زراعت اور عالمی برانڈنگ کے لیے اہم اقدامات کیے جا رہے ہیں، جبکہ نئے ای ڈی ایف بورڈ کی تشکیل سے برآمدات میں اضافہ ممکن ہوگا۔

جام کمال خان نے کہا کہ پاکستان کو بین الاقوامی سطح پر مزید متعارف کروانے کے لیے وسائل فراہم کیے جا رہے ہیں، ایکسپو 2025 اوساکا جاپان میں پاکستان کی شرکت کے لیے منصوبے منظور کیے گئے ہیں۔

 جام کمال خان نے یہ بھی کہا کہ مختلف شعبوں میں تحقیق و ترقی اور ٹیکنالوجی کے حصول کے لیے فنڈز مختص کیے گئے ہیں، پاکستانی برآمد کنندگان کی ضروریات کو مدنظر رکھتے ہوئے اقدامات کیے جا رہے ہیں اس کے علاوہ خیبر پختونخوا میں پہلے ایکسپو سینٹر کی تکمیل کے لیے فنڈز کی منظوری دی گئی ہے۔

واضح رہے کہ یہ سارے فیصلے ای ڈی ایف بورڈ کی 85 ویں میٹنگ میں لیے گئے ہیں، جبکہ نئے بورڈ کی تشکیل کے بعد یہ پہلی میٹنگ تھی۔