لاہور: پنجاب حکومت کی جانب سے بجلی کے گھریلو صارفین کے لیے 14 روپے فی یونٹ کے ریلیف کے اعلان کے بعد اسلام آباد الیکٹرک سپلائی کمپنی (آئیسکو) نے بجلی صارفین کو ملنے والے ریلیف کی ترسیل شروع کردی۔

 ترجمان آئیسکو کے مطابق 14 روپے فی یونٹ ریلیف ماہ اگست اور ستمبر 2024 کے بجلی بلوں میں دیا جائے گا، گھریلو صارفین جن کا منظور شدہ لوڈ 5 کلو واٹ تک ہے وہ مستفید ہوں گے۔

ترجمان کا کہنا ہے کہ ریلیف کے لئے ماہ اگست اور ستمبر میں استعمال شدہ یونٹس کی حد 201 سے 500 تک ہو، آئیسکو کے 10 لاکھ 71 ہزار 632 گھریلو صارفین اس ریلیف سے مستفید ہوں گے۔

ترجمان آئیسکو نے مزید بتایا کہ صارفین کی سہولت کے لئے بجلی بلوں کی مقررہ تاریخ میں توسیع بھی کر دی گئی ہے۔

واضح رہے کہ وزیراعلیٰ پنجاب مریم نواز کے احکامات کی روشنی میں 201 تا 500 یونٹ تک کے بجلی صارفین کو 14 روپے یونٹ کمی کا ریلیف پہنچنے لگا ہے، لاہور، ملتان، فیصل آباد، گوجرانوالہ، اسلام آباد کی بجلی کمپنیوں کے صارفین کو ریلیف دیا گیا، مجموعی طور پر35 لاکھ 16 ہزار 877 بجلی صارفین کو ریلیف دیا گیا۔

اس حوالے سے پنجاب کی سینئر وزیر مریم اورنگزیب نے کہا کہ وزیراعظم نے ایک سے 200 یونٹ والے بجلی صارفین کو 50 ارب روپے کا ریلیف دیا جبکہ وزیراعلیٰ پنجاب نے مشکل معاشی حالات میں بھی ناممکن کام ممکن کر دکھایا، عوام کو مزید ریلیف بھی دیں گے۔