پاکستان مسلم لیگ (ن) کے سینئر رہنما عرفان صدیقی نے کہا ہے کہ آئینی ترامیم آنے میں ہفتہ یا دس دن لگ سکتے ہیں۔

سینیٹ میں پارلیمانی پارٹی کے قائد سینیٹر عرفان صدیقی نے پارلیمنٹ کے باہر میڈیا سے گفتگو کرتے ہوئے کہا کہ مولانا فضل الرحمان نے کوئی وقت نہیں مانگا، مولانا نے صرف اتنا کہا تجاویز کو تفصیل کے ساتھ دیکھنا ہے۔

انہوں نے بتایا کہ مولانا فضل الرحمان نے کہا اصولی طور پر بہت سی چیزوں پر ایگری کرتا ہوں، میں نے لوگوں کے سامنے جانا ہے اور خود تفصیلات کو جاننا چاہتا ہوں۔

سینیٹر عرفان صدیقی نے کہا کہ ڈھائی 3 گھنٹوں کی ملاقات میں دیکھا مولانا فضل الرحمان کا ردعمل مثبت تھا، مولانا نے حکومت اور حکومت نے مولانا کی رائے سے اتفاق کیا مزید کچھ دن انتظار کیا جائے۔

لیگی رہنما نے مزید کہا کہ عقت دیا ہے تاکہ مولانا فضل الرحمان اپنی رائے قائم کر سکیں، مولانا جزیات دیکھیں گے اور اپنی رائے دیں گے۔