وفاقی وزیر دفاع خواجہ آصف نے کہا ہے کہ پارلیمنٹ کی مضبوطی کے لیے سب کو مل کر کام کرنا ہوگا۔

قومی اسمبلی اجلاس میں وفاقی وزیر دفاع خواجہ آصف نے اظہارِ خیال کرتے ہوئے کہا کہ پارلیمنٹ حملے میں کسی ایک شخص نے حمایت نہیں کی، ہمیں ایوان نے جس کام کے لیے بھیجا ہے وہ کرنا چاہیے۔

انہوں نے کہا کہ اس ہاؤس کا تقدس بحال کیا جائے، پارلیمنٹ میں پیش آئے واقعے کی سب نے مذمت کی، کمیٹی میں مجھے مکے مارے گئے یہ ہوا وہ ہوا کی باتیں شروع ہوگئیں۔

ان کا کہنا تھا کہ کمیٹی میں اس قسم کی باتیں شروع ہوئیں تو وہاں بھی احتجاج کیا، کمیٹی میں ایک لمبی داستان سنائی گئی، ہمیں بھی پارلیمنٹ لاجز سے اٹھایا گیا تھا، اس کی کسی نے مذمت نہیں کی تھی، کمیٹی ہاؤس کے تحفظ کے لیے بنائی گئی تھی۔

خواجہ آصف نے کہا ہے کہ پارلیمنٹ کی مضبوطی کے لیے سب کو مل کر کام کرنا ہوگا، پارٹی کو بتا دیا اس کمیٹی کا حصہ نہیں رہنا چاہتا، نواز شریف کی اہلیہ کا انتقال ہوا، بات کرانے کے لیے درخواست کی، نواز شریف کی اہلیہ کے انتقال پر بھی سیاست کی گئی۔

وفاقی وزیر دفاع کا کہنا تھا کہ ان لوگوں نے کمیٹی کو اپنی پارٹی کے بیانیے کے لیے استعمال کیا، یہ اپنے ماضی پر تو تھوڑی دیر کے لیے نظر دوڑائیں، نئی روایات قائم کرنے کے لیے یہ پہلے ماضی پر پشیمانی کا اظہار کریں۔

انہوں نے مزید کہا کہ کل ان کی گود میں بیٹھے ہوئے تھے آج ان کے خلاف بولتے ہیں، پی ٹی آئی دور میں اسمبلی میں 20 منٹ میں 52 بلز پاس کرائے گئے، اگر یہ ماضی کو ڈیلیٹ کرنا چاہتے ہیں تو معذرت کرلیں۔