اسلام آباد: وفاقی حکومت نے یوٹیلیٹی اسٹورز پر سبسڈی روک دی ہے۔

ذرائع کے مطابق یوٹیلیٹی اسٹورز کارپوریشن پر ماہانہ سبسڈی 4 ارب روپے تھی، وفاقی حکومت یوٹیلیٹی اسٹورز پر سالانہ 60 ارب روپے سبسڈی دے رہی تھی۔

ذرائع کا کہنا ہے کہ یوٹیلیٹی اسٹورز کارپوریشن پر 50 ارب روپے وزیراعظم ریلیف پیکج کیلئے مختص تھے، اسٹورز پر 10 ارب رمضان ریلیف پیکج کے تحت سبسڈی دی جارہی تھی  جبکہ یہ سبسڈی بے نظیر انکم سپورٹ پروگرام صارفین کیلئے مختلف تھی۔

یوٹیلیٹی اسٹورز کارپوریشن کے حکام نے بتایا کہ یوٹیلیٹی اسٹورز پر بے انکم سپورٹ اور عام صارفین کیلئے یکساں نرخ پر چیزیں دستیاب ہوں گی، وفاقی حکومت سبسڈی کے طریقہ کار کو بہتر بنانے پر کام کررہی ہے۔

حکام کے مطابق کارپوریشن کو سیلز بڑھانے یا نقصان والے اسٹورز بند کرنے کا ٹاسک دے دیا گیا، یوٹیلیٹی اسٹورز پر سبسڈی بحال کرنے کا فیصلہ وفاقی حکومت نے کرنا ہے۔

یوٹیلیٹی اسٹورز کارپوریشن کے حکام نے مزید کہا کہ سبسڈی کے عمل کو مزید شفاف بنانے کیلئے مختلف آپشنز پر کام ہورہا ہے، کارپوریشن نے مختلف برانڈز کی اشیاء کی قیمتوں میں کمی کی ہے، مقامی فلور ملز سے خریداری کے بعد آٹے کی فراہمی یقینی بنائی جائے گی۔