فیصل آباد: وزیر اطلاعات پنجاب عظمیٰ بخاری نے کہا ہے کہ ججز کی تعداد میں اضافے کے معاملے سے عام آدمی پر بھی فرق پڑے گا۔

عظمیٰ بخاری نے میڈیا سے گفتگو کرتے ہوئے کہا کہ پاکستان ہماری ریڈ لائن ہے، کوئی ادارہ پاکستان سے اوپر نہیں، پاکستان ہے تو ہم ہیں۔

انہوں نے کہا کہ بانی پی ٹی آئی تنہا بلبلا رہے ہیں، بانی پی ٹی آئی ان سے بات کرنا چاہ رہے ہیں جو راضی نہیں، پی ٹی آئی والے مولانا کے در پر حاضریاں لگارہے ہیں، مولانا فضل الرحمان کا مینڈیٹ خیبرپختونخوا میں چوری ہوا۔

وزیر اطلاعات نے کہا کہ آئینی ترامیم پر اتفاق رائے پیدا کرنا ضروری ہے، آئینی ترامیم کے ایک دو نکات پر مزید تبادلہ خیال کی ضرورت ہے۔

انکا کہنا تھا کہ ججز کی تعداد میں اضافے کے معاملے سے عام آدمی پر بھی فرق پڑے گا، کچھ لوگوں کو فتنہ فساد پھیلانا ہے، فتنہ پھیلانے والی جماعت کو آئینی ترمیم کی فکر ستا رہی ہے۔

عظمیٰ بخاری نے کہا کہ عاشورہ کے لئے بھی وزراء کی ڈیوٹیاں لگائیں، عید میلادالنبی خوشی کے موقع پر اکھٹے ہیں، پنجاب حکومت اس دن کو سرکاری سطح پر منانے کے انتظامات کیے ہیں، وزیر اعلیٰ کی ہدایت کے مطابق جلوسوں میں مٹھائی، حلوہ نیاز کے طور پر تقسیم کریں گے۔

انہوں نے کہا کہ تمام علماء سے رابطے میں ہیں، مساجد کی سرکاری سطح پر صفائی ستھرائی کرائی جارہی ہے، جلوسوں کو فول پروف سیکیورٹی دیں گے۔

 وزیر اطلاعات نے مزید کہا کہ 1581 محافل، 2647 جلوس ہونگے، حساس شہروں میں سیف سیٹی کیمروں سے مانیٹرنگ ہوگی، وزیر اعلیٰ خود مانیٹرنگ کریں گی، اس دن پر نہ سیاست کی گنجائش ہے نہ ہونی چاہیے، وزیر اعلیٰ کی طرف سے اقدامات سب کے لئے ہوتے ہیں۔