کراچی: عالمی بینک کی جانب سے سندھ میں سیلاب متاثرین  کے گھروں کی تعمیر کیلئے 22 کروڑ ڈالرز فراہم کردیے گئے ہیں۔

عالمی بینک کے کنٹری ڈائریکٹر ناجی بینہسین نے بریفنگ میں کہا کہ سیلاب متاثرین کی بحالی اور تعمیر نوں کے لیے 2 ارب ڈالرز امداد کا اعلان کیا تھا، سیلاب متاثرین کے نئے منصوبوں کے لئے ایک ارب 55 کروڑ ڈالرز مختص کیے گئے ہیں۔

عالمی بینک کے کنٹری ڈائریکٹر کا کہنا ہے کہ سیلاب متاثرین کے لئے 270 ملین ڈالرز کی کیش رقم بھی جاری کی گئی ہے جب کہ موجودہ منصوبوں کے لئے 45 کروڑ 50 لاکھ ڈالرز مختص کیے گئے ہیں۔

انہوں نے بتایا کہ زیادہ تر فنڈنگ سندھ میں سیلاب متاثرین کی امداد کے لیے مختص کی گئی ہے، سندھ میں سیلاب متاثرین کے گھروں کی تعمیر کے لئے 500 ملین ڈالرز خرچ کیے جائیں گے جب کہ 22 کروڑ ڈالرز فراہم کردیے گئے ہیں۔

ان کا کہنا تھا کہ سندھ میں 21 لاکھ گھروں کی تعمیر کے لئے فنڈز فراہم کیے جارہے ہیں، 9 لاکھ 35  ہزار بینک اکاؤنٹس کھولے جاچکے ہیں جب کہ سیلاب متاثرین کو گھروں کی تعمیر کے لئے رقم چار اقساط میں فراہم کی جارہی ہے ہیں۔

ناجی بینہسین نے یہ بھی بتایا کہ سندھ میں 6 لاکھ 40 ہزار سیلاب متاثرین کے گھروں کی تعمیر شروع کردی گئی ہے، انتہائی شفاف طریقے سے سیلاب متاثرین میں امدادی رقوم دی جارہی ہیں جب کہ صوبہ بلوچستان میں 104 سیلاب متاثرین کے بینک اکاؤنٹس کھولے گئے ہیں۔

عالمی بینک کے کنٹری ڈائریکٹر کا مزید کہنا تھا کہ بلوچستان میں سیلاب متاثرین کو گھروں کی تعمیر کے لیے رقوم فراہم نہیں کی گئیں لیکن صوبہ بلوچستان میں 4 لاکھ روپے کی امداد دی جائے گی اور صوبہ سندھ میں گھروں کی تعمیر کے لئے 3 لاکھ روپے فی گھر فراہم کیے جائیں گے۔