لاہور: وزیر اعلیٰ پنجاب مریم نواز نے چین کے وزیراعظم لی چیانگ کی آمد پر پرجوش انداز میں خیر مقدم کیا ہے۔

وزیر اعلیٰ پنجاب مریم نواز شریف کا کہنا ہے کہ چین کے وزیراعظم لی چیانگ کو حکومت پنجاب اور عوام کی جانب سے خوش آمدید کہتے ہیں، چینی وزیر اعظم کے دورہ پاکستان کو باہمی دوستی کے نئے باب کی شروعات سمجھتے ہیں۔

مریم نواز نے کہا کہ چین اور پاکستان کے مابین تعلقات عالمی امن، خطے کی خوشحالی اور ترقی کے ضامن ہیں، پاکستان اور چین کے درمیان تعلقات میں گرم جوشی کا سہرا پاکستان مسلم لیگ (ن) کے قائد محمد نوازشریف کے سر ہے-

ان کا کہنا تھا کہ وزیراعظم محمد شہبازشریف پاک چائنہ تعلقات کو مزید مضبوط اور مستحکم کرنے میں بھرپور کردار ادا کررہے ہیں۔ پاکستان مسلم لیگ ن کے دور حکومت میں سی پیک کا آغاز پاک چین دوستی کا ناقابل تردید ثبوت ہے۔

وزیر اعلیٰ پنجاب کہتی ہیں کہ چینی وزیراعظم کی آمد سے سی پیک پراجیکٹس میں تیزی آئے گی اور روزگار کے لاکھوں مواقع پیدا ہوں گے۔ پاکستان اور چین کے درمیان باہمی دوستی، اعتماد اور احترام کی مضبوط بنیاد پر قائم ہے۔

انہوں نے کہا کہ مشکل کی ہر گھڑی میں پاکستان اور چین کا باہمی تعاون تاریخ کا حصہ بن چکا ہے، پاکستان اور چین مل کر خوشحال اور پرامن مستقبل کی طرف بڑھ رہے ہیں جب کہ پاک چین دوستی ہر گزرتے دن کے ساتھ مزید مضبوط اور مستحکم ہو رہی ہے۔

مریم نواز مزید کہتی ہیں کہ بیلٹ اینڈ روڈ انیشیٹو عالمی خوشحالی کے لیے چین کے عزم کا اظہارکرتا ہے، چین کی اقتصادی ترقی کے ثمرات سے دنیا بھر کے لوگ مستفید ہورہے ہیں۔