اسلام آباد: پیپلزپارٹی کے رہنما عبدالقادر پٹیل نے قومی اسمبلی اجلاس کے دوران پی ٹی آئی کو کرارا جواب دے دیا۔

قومی اسمبلی کے اجلاس کے دوران خطاب کرتے ہوئے پاکستان پیپلزپارٹی کے رہنما عبدالقادر پٹیل نے پی ٹی آئی کو جواب دیتے ہوئے کہا کہ ہمیں کہا گیا کہ آئینی ترمیم ہم نہیں کوئی اور لایا ہے جب کہ ن لیگ کو پی پی کے خلاف آئی جے آئی کے طور پر لایا گیا لیکن مسلم لیگ ن نے وقت کے ساتھ سبق سیکھا۔

عبدالقادر پٹیل نے کہا کہ ہمارا ایک منشور اور مقصد ہے جب کہ مسلم لیگ ن کا بھی منشور ہے لیکن بتایا جائے پی ٹی آئی کا کیا منشور ہے، انہوں نے بھاگنے کے لئے کورم کی نشاندہی کی جو ناکام رہی اور ہم نے انہیں گریبان سے پکڑ کر یہاں بٹھایا جب کہ انہیں جلن مولانا فضل الرحمان سے ہے جو قائل ہوگئے۔

پیپلزپارٹی کے رہنما کا کہنا ہے کہ جب فریال تالپور کو آدھی رات کو اسپتال سے جیل لے جایا گیا وہ یاد نہیں؟، جنات کے گھرمیں پتھر پھینکو گے تو پھر بد روحیں نکلیں گی۔ آج 5 ووٹ دینے والوں کو لوٹے کہتے ہو لیکن کل صادق سنجرانی کو ووٹ دینے والے کیا لوٹےنہیں تھے؟، وہ وقت دیکھنا جب آپ کو بھاگنے کی جگہ نہیں ملے گی۔

انہوں نے کہا کہ ابھی تو 5 آئے لیکن چاہتے تو 50 بھی ووٹ دینے کو تیار تھے، دھرنوں میں ڈانس کروانا اور تسبیح ہاتھ میں گھمانا کہاں کا اصول ہے، غیر جمہوری جعلی حکومت سے صوبے کے لیے فنڈ کیوں مانگ رہے ہو۔

عبدالقادر پٹیل کا مزید کہنا تھا کہ یہ ہمیں سندھ میں گورنر راج کی دھمکیاں دیتے تھے جب کہ ہم آپ کے صوبے میں بھی گورنرراج کے مخالف ہیں۔ اب ان کا کام اداروں اور معیشت پر حملہ کرنا ہے، جب معیشت بہترہونے لگتی ہے تواحتجاج کی کال دے دیتے ہیں، یہ سیاست میں موقع دو کے لئے منتیں کر رہے ہیں۔