اسلام آباد: مخصوص نشستوں کے کیس میں سپریم کورٹ نے دوسری وضاحت جاری کردی ہے۔

سپریم کورٹ نے مخصوص نشستوں کے کیس میں دوسری وضاحت جاری کرتے ہوئے کہا کہ الیکشن ایکٹ میں ترمیم عدالتی فیصلے کو غیر مؤثرنہیں کرسکتی۔

سپریم کورٹ کا کہنا تھا کہ الیکشن ایکٹ میں ترمیم کا ماضی سے اطلاق سپریم کورٹ پرنہیں ہوسکتا جب کہ اکثریتی ججز نے اپنی وضاحت الیکشن کمیشن کو بھجوانے کا حکم دے دیا ہے۔

وضاحت میں سپریم کورٹ کا کہنا ہے کہ الیکشن کمیشن سپریم کورٹ کے فیصلے پر عمل درآمد کا پابند ہے، تفصیلی فیصلے کے بعد مزید وضاحت کی ضرورت نہیں تھی۔

سپریم کورٹ نے مزید کہا کہ الیکشن کمیشن نے پہلے وضاحت کے لئے رجوع کیا جو جاری کی گئی، سپریم کورٹ نے اپنی وضاحت کو تفصیلی فیصلے کا بھی حصہ بنایا۔

سپریم کورٹ نے واضح کیا کہ سپریم کورٹ کا فیصلہ ماننا آرٹیکل 189 کے تحت لازم ہے، تحریک انصاف اور الیکشن کمیشن دوسری وضاحت کے لئے عدالت سے رجوع کیا جب کہ سپریم کورٹ نے ووٹر کے حقوق کی عمل داری کے لئے اپنے فیصلے میں ریلیف دیا تھا۔

واضح رہے کہ سپریم کورٹ نے الیکشن کمیشن اور پی ٹی آئی کی درخواست پر دوسری وضاحت جاری کی ہے۔