کراچی: وفاقی حکومت دسمبر 2024 میں گرین لائن بس سروس سندھ حکومت کے حوالے کرے گی۔

حکومت سندھ نے گرین لائن بس سروس کے آپریشنز سنبھالنے کے لئے تیاریاں مکمل کرلی ہیں، اس حوالے سے صوبائی وزیر شرجیل انعام میمن کی زیر صدارت اعلیٰ سطح کا اجلاس ہوا جس میں گرین لائن بس سروس کے آپریشنز کا تفصیلی جائزہ لیا گیا۔

اجلاس میں شرجیل انعام میمن کو گرین لائن منصوبے پر تفصیلی بریفنگ دی گئی اور گرین لائن منصوبے کو اورنج لائن سے جوڑنے والے منصوبے پر بھی تفصیلی بات چیت کی گئی۔

سینئر وزیر شرجیل میمن کی جانب سے گرین لائن کو اورنج لائن سے جوڑنے والے منصوبے کو جلد از جلد پایہ تکمیل تک پہنچانے کی ہدایت کی گئی۔

اجلاس میں جاری آپریشنز، یوٹیلیٹی سروسز، اور گرین لائن بس سروس کے لیے سبسڈیز پر بھی تبادلہ خیال کیا گیا۔

اس موقع پر صوبائی وزیر شرجیل انعام میمن نے گفتگو کرتے ہوئے کہا کہ گرین لائن منصوبہ کراچی کے پبلک ٹرانسپورٹ سسٹم کا ایک اہم جزو ہے، وفاقی حکومت کی جانب سے گرین لائن منصوبہ دسمبر 2024 میں حکومت سندھ کے حوالے کر دیا جائے گا، چاہتے ہیں کہ گرین لائن کو اورنج لائن کو جوڑنے والا منصوبہ دسمبر 2024 سے پہلے ہی مکمل ہوجائے۔

انہوں نے کہا کہ وفاقی حکومت کی جانب سے گرین لائن کے آپریشنز کے لئے 2 ارب کی سبسڈی دی جارہی ہے، حکومت سندھ اس پر نظرثانی کرے گی، گرین لائن منصوبہ وفاق سے حکومت سندھ کو منتقل ہونے کے بعد شہریوں کے لیے ٹرانسپورٹ مزید موثر اور بہتر بنانے کے لئے اس میں مزید بسیں شامل کی جائیں گی۔

شرجیل میمن نے مزید کہا کہ پہلے سے جاری حکومت سندھ کے پبلک ٹرانسپورٹ کے منصوبوں  کی وجہ سے عوام نے سکھ کا سانس لیا ہے، پبلک ٹرانسپورٹ کراچی کا دیرینہ مسئلہ رہا ہے، چاہتے ہیں کہ ٹرانسپورٹ کے نظام میں مزید بہتری لائی جائے۔

واضح رہے کہ اجلاس میں سیکریٹری ٹرانسپورٹ اسد ضامن، ماس ٹرانزٹ اتھارٹی کے ایم ڈی کمال حکیم دایو، سی ای او ٹرانس کراچی شمائلہ محسن اور دیگر نے شرکت کی۔