8 اکتوبر 2005 کی صبح پاکستان میں آئے 7.6 شدت کے زلزلے کو 19 برس گزر گئے۔

8 اکتوبر کے زلزلے سے آزاد کشمیر، خیبرپختونخوا کے بعض علاقے بری طرح متاثر ہوئے تھے، اس زلزلے سے 30 لاکھ افراد بےگھر ہوئے تھے، زلزلے کے ابتدائی تخمینے 88 ہزار اموات کی صورت میں سامنے آئے۔

زلزلے کے باعث دریائے کنہار کے کنارے واقع خوبصورت شہر بالاکوٹ مکمل تباہ ہوگیا تھا، آزاد کشمیر میں مظفرآباد سے باغ، راولاکوٹ سمیت کئی علاقوں میں تباہی کے دل سوز مناظر تھے۔

دارالحکومت مظفرآباد سمیت آزاد جموں کشمیر بھر میں شہدائے زلزلہ کی برسی آج منائی جائے گی، مظفرآباد میں مرکزی تقریب یونیورسٹی گراؤنڈ میں منعقد ہوگی، جس میں وزیراعظم، وزراء، چیف سیکریٹری اور آئی جی پولیس سمیت دیگر افراد شرکت کریں گے۔

علاوہ ازیں وزیراعظم یادگار شہداء پر پھول چڑھائیں گے، اس موقع پر پولیس کے دستے سلامی بھی پیش کریں گے، تاہم اس زلزلے میں سب سے زیادہ سرکاری املاک تباہ ہوئی تھیں۔