لاہور: وزیر اطلاعات پنجاب عظمیٰ بخاری نے کہا ہے کہ آج اڈیالہ جیل کے قیدی کے لئے بہت بڑا “سرپرائز ڈے” ہے۔

عظمیٰ بخاری نے بیرسٹر سیف کے بیان پر ردعمل دیتے ہوئے کہا کہ آج جمہوریت کی جیت ہے پارلیمنٹ کی جیت ہے، آئینی ترامیم کی منظوری پر جمہوریت پسند خوش ہیں آمریت پسند سیخ پا ہیں۔

انہوں نے کہا کہ ججز اور انکی فیملیوں کے خلاف کردار کشی مہم چلانے والے آج عدلیہ کے ہمدرد بن رہے، تحریک انصاف سیاسی جماعت کم سیاسی یتیموں کا گروہ بنا چکا، انہوں نے اپنی گندی سیاست کے لیے پہلے طلباء کو اشتعال دلایا اب وکلاء سے باہر نکلنے کی اپیلیں کررہی ہے۔

صوبائی وزیر نے کہا کہ پاکستان کے عوام اڈیالہ جیل کے قیدی اور اسکے چمچے کڑچھوں کا بھیانک روپ دیکھ چکے، پاکستان کے عوام باشعور ہیں اب اڈیالہ جیل کے مستقل رہائشی کے جھانسے میں نہیں آئیں گے۔

انکا کہنا تھا کہ چیف جسٹس فائز عیسیٰ کا نام عدلیہ کی تاریخ میں سنہری حروف سے لکھا جائے گا، انہوں نے تمام فیصلے آئین اور قانون کے مطابق کیے، وزیراعظم شہبازشریف اور انکی ٹیم بھی خراج تحسین کے مستحق ہیں۔

عظمیٰ بخاری نے کہا کہ آئینی ترامیم کی منظوری کے سلسلے میں جس نے بھی رول ادا کیا وہ قابل ستائش ہیں، پارلیمنٹ کی بالادستی میں ہی جمہوریت کی مضبوطی ہے۔

وزیر اطلاعات پنجاب نے مزید کہا کہ جن کی قسمت میں رونا دھونا لکھا ہے وہ آئینی ترامیم اور قانون سازی میں رخنے ہی ڈال سکتے، آج اڈیالہ جیل کے قیدی کے لیے بھی بہت بڑا “سرپرائز ڈے” ہے۔