اسلام آباد: پاکستان اور چین کی پارلیمانی سفارتکاری متحرک ہوگئی،  چیئرمین سینیٹ سید یوسف رضا گیلانی اور اسپیکر قومی اسمبلی سردار ایاز صادق نے چینی وزیر اعظم لی چیانگ سے ملاقات کی ہے۔

ملاقات کے دوران اسپیکر قومی اسمبلی اور چیئرمین سینیٹ نے دوطرفہ تعلقات کے مختلف پہلوؤں پر تبادلہ خیال کیا اور دونوں ممالک کے درمیان پارلیمانی روابط کو مزید مستحکم کرنے پر بھی اتفاق کیا گیا۔

ملاقات میں اسپیکر ایاز صادق اور یوسف رضا گیلانی نے پاک چین پارلیمانی سفارتکاری میں تیزی لانے کی ضرورت پر بھی زور دیا۔

اس موقع پر اسپیکر قومی اسمبلی ایاز صادق نے گفتگو کرتے ہوئے کہا کہ پاکستان چین کے ساتھ تعلقات کو عوامی خواہشات کے مطابق بہت اہمیت دیتا ہے۔

انہوں نے کہا کہ شنگھائی تعاون تنظیم کے اجلاس کی میزبانی پاکستان کے لیے اعزاز ہے، چین پاکستان کا بااعتماد اور مخلص دوست ہے، پاکستان کو چین کے ساتھ اپنی سدا بہار دوستی پر فخر ہے۔

ایاز صادق نے کہا کہ شنگھائی تعاون تنظیم کے فورم سے علاقائی تعاون کو فروغ ملے گا، اجلاس سے علاقائی استحکام کو تقویت ملے گی پاکستان شنگھائی تعاون تنظیم کے پلیٹ فارم کو بہت اہمیت دیتا ہے۔

انکا کہنا تھا کہ شنگھائی تعاون تنظیم کے اجلاس سے عالمی سطح پر پاکستان کا مثبت تاثر اجاگر ہوگا، اس کے پلیٹ فارم سے علاقائی ترقی کے لیے کام کریں گے، پاک چین اقتصادی راہداری (سی پی ای سی) کے منصوبے دونوں ممالک کے لیے خصوصی اہمیت کے حامل ہیں۔

اسپیکر نے کہا کہ پاکستان میں مختلف شعبوں میں سرمایہ کاری کے وسیع تر مواقع موجود ہیں، تعلیمی اور سائنسی تعاون بڑھانے کی بھی ضرورت ہے۔

انہوں نے کہا کہ ٹیکنالوجی اور ڈیجیٹل معیشت میں تعاون سے پاکستانی عوام کو بہت فائدہ ہوگا، چین پاکستان کا اسٹریٹجک شراکت دار، مستقبل میں تعاون کو مزید فروغ دیا جائے گا، پاکستان اور چین کے مابین پارلیمان کی سطح پر تعاون بڑھایا جائے گا۔

ایاز صادق نے مزید کہا کہ مستقبل میں پارلیمانی وفود کے تبادلے کو فروغ دیا جائے گا، چین کے وزیراعظم کا حالیہ دورہ پاکستان دوطرفہ تعلقات کو مزید مستحکم بنانے میں اہم پیش رفت ثابت ہو گا۔