پشاور: دہشت گردوں نے خیبرپختونخوا کے مختلف علاقوں میں پولیو ٹیم پر حملے کرکے ایک پولیس اہلکار کو شہید کردیا۔

خیبرپختونخوا کے علاقے اورکزئی میں دہشت گردوں نے پولیو ٹیم پر فائرنگ کردی جس کے نتیجے میں ایک پولیس اہلکار شہید ہوگیا۔

سیکیورٹی فورسز ذرائع کے مطابق اس وقت پہاڑوں میں دہشت گردوں اور فورسز کے درمیان سخت مقابلہ جاری ہے جب کہ آپریشن میں پولیس اور اورکزئی اسکاوٹس سمیت ایف سی کے اہلکار شامل ہیں۔

ذرائع کا کہنا ہے کہ پولیس کی فائرنگ سے تین دہشت گرد ہلاک ہوگئے ہیں تاہم پولیو کا عملہ اس حملے میں محفوظ رہا ہے۔

دوسری جانب کوہاٹ میں پولیو ٹیم پر حملہ ناکام بنادیا گیا ہے، موٹر سائیکل سوار دہشت گردوں نے درے وال بانڈہ میں پولیو ٹیم پر آتشیں اسلحہ سے حملہ کیا تھا۔

کوہاٹ پولیس کے بہادر جوانوں نے کوئیک رسپانس کرکے حملہ ناکام بنایا، حملہ آور جائے وقوعہ پر موٹر سائیکل اور موبائل فون چھوڑ کر فرار ہوگئے۔

واقعے کی اطلاع پر ڈی پی او کوہاٹ محمد عمر خان فی الفور موقع پر پہنچ گئے، پولیس کی بھاری نفری نے علاقے کو گھیرے میں لے کر سرچ آپریشن شروع کردیا ہے اور حملہ آوروں کی گرفتاری کے لیے کارروائی جاری ہے۔