اسلام آباد: وزیر اعظم شہباز شریف کی جانب سے پشین اور ژوب میں کامیاب کارروائیوں پر سیکیورٹی فورسز کو خراج تحسین پیش کیا گیا ہے۔

وزیراعظم محمد شہباز شریف نے ضلع پشین اور ژوب میں فتنہ الخوارج کے خلاف کامیاب کارروائیوں پر سیکیورٹی فورسز کے افسران و جوانوں کی پذیرائی کی۔

وزیرِ اعظم نے پانچ خوارج کو گرفتار کرنے اور دو خوارج کو جہنم واصل کرنے سمیت بڑی تعداد میں اسلحہ و دھماکہ خیز مواد ضبط کرنے پر افسران و جوانوں کی تعریف کی۔

شہباز شریف کا کہنا تھا کہ مجھ سمیت پوری قوم وطن عزیز کو فتنہ الخوارج سے پاک کرنے کے لئے دن رات سرگرمِ عمل پاک فوج کے افسران و جوانوں کو خراجِ تحسین پیش کرتی ہے۔

وزیرِ اعظم نے کہا کہ پاکستان کے دشمنوں کے ملک میں انتشار و بد امنی پھیلانے کے عزائم کو خاک میں ملانے کے مشن میں پوری قوم افواجِ پاکستان کے ساتھ شانہ بشانہ کھڑی ہے۔

واضح رہے کہ سیکیورٹی فورسز نے بلوچستان کے ضلع پشین اور ژوب میں انٹیلیجنس بیسڈ کامیاب آپریشن کرتے ہوئے 5 خوارج کو گرفتار اور 2 کو جہنم واصل کردیا ہے۔