لاہور: وزیر اطلاعات پنجاب عظمیٰ بخاری نے نیوز کانفرنس کرتے ہوئے بتایا کہ مریم نواز صحافیوں کو جلد پلاٹس کے لیٹرز تقسیم کریں گی۔

وزیر اطلاعات پنجاب عظمیٰ بخاری کا کہنا ہے کہ وزیراعلیٰ پنجاب نے صحافیوں کی فلاح کے لئے مختلف اقدامات کیے جب کہ پنجاب حکومت صحافیوں کے لئے دن رات کام کررہی ہے۔

عظمیٰ بخاری نے کہا کہ پریس کلبوں میں گرانٹس تقسیم کی جارہی ہیں، روڈا میں صحافیوں کے لئے پلاٹوں کی اسکیم شروع کی گئی ہے۔

ان کا کہنا تھا کہ روڈا کے حوالے سے وزیراعلیٰ پنجاب نے کمیٹی بنائی ہے اور مریم نواز صحافیوں کو جلد پلاٹس کے لیٹرز تقسیم کریں گی۔

وزیر اطلاعات پنجاب کہتی ہیں کہ وزیراعلیٰ مریم نواز نے ایک سال میں 80 منصوبے شروع کیے، بہت سے منصوبے مکمل بھی ہوگئے جو جلد تکمیل کو پہنچ جائیں گے۔

انہوں نے بتایا کہ وزیراعلیٰ مریم نوازعوام کو زیادہ سے زیادہ ریلیف دینے کی خواہاں ہیں جب کہ مریم نواز صوبے کی ترقی اور خوشحالی کے لئے محنت کررہی ہیں۔

عظمیٰ بخاری مزید کہتی ہیں کہ وزیراعلیٰ پنجاب خدمت اورکارکردگی پر یقین رکھتی ہیں، متعدد کاشتکاروں میں کسان کارڈ کا اجرا کیا جاچکا ہے جب کہ کسانوں کو جدید زرعی آلات بھی فراہم کیے جائیں گے۔