اسپیکر ملک محمد احمد خان نے کہا کہ پاکستان میں انسانی حقوق کی صورتحال تیزی سے بہتر ہو رہی ہے۔

راؤ ماجد علی میڈیا کوآرڈینیٹر برائے اسپیکر پنجاب اسمبلی کے مطابق پاکستان نے انسانی حقوق سے متعلق کارکردگی کے جائزے کے معاملے پر اقوام متحدہ انسانی حقوق کمیٹی کے جنیوا میں خصوصی اجلاس میں شرکت کی۔

اجلاس میں اسپیکرملک محمد احمد خان کی قیادت میں وفد نے بین الاقوامی عہد نامہ برائے شہری و سیاسی حقوق (ICCPR) پر عملدرآمد سے متعلق پاکستان کی انسانی حقوق رپورٹ کا جائزہ پیش کیا۔

وفد نے 2017 کے بعد انسانی حقوق کے شعبے میں پیشرفت پر روشنی ڈالتے ہوئے کہا کہ پاکستان میں انسانی حقوق کی صورتحال تیزی سے بہتر ہو رہی ہے، جبکہ امتیازی سلوک کے خلاف قانونی فریم ورک کو مضبوط بنانے کے اقدامات کیے۔

انہوں نے کہا کہ پاکستان میں خواتین، بچوں اور اقلیتوں کے حقوق کے تحفظ کے لیے پر عزم ہے، نفرت انگیز تقریر کے خاتمے اور صنفی تشدد کے خلاف مضبوط اقدامات کر رہے ہیں۔

 ملک محمد احمد خان  نے کہا کہ پاکستان میں جمہوریت، آزاد عدلیہ اور آزاد میڈیا مضبوطی کی جانب گامزن ہے، جبکہ تحفظ حقوق نسواں کیلئے انسداد ہراسگی اور  وراثتی حقوق پر قانون سازی کی گئی ہے، ساتھ ہی انہوں نے پاکستان کا اقوام متحدہ کے انسانی حقوق اداروں کے ساتھ تعاون جاری رکھنے کا اعلان کیا۔

پاکستانی وفد نے کہا کہ عوام کے انسانی حقوق کا تحفظ اور فروغ اولین ترجیح ہے، جبکہ پاکستانی وفد نے ICCPR پر عملدرآمد کو مزید بہتر بنانے کے لیے قومی سطح پر کوششوں کا عزم کا اظہار کیا۔

واضح رہے کہ وفد میں وزیر قانون ملک صہیب بھرتھ اور سیکرٹری وزارتِ انسانی حقوق، اللہ دینو خواجہ شامل تھے۔