خیبرپختونخوا کے 17 اضلاع میں نیبرہڈ، ویلیج کونسلز کی 53 خالی نشستوں پر ضمنی بلدیاتی انتخابات کے لئے پولنگ کا عمل جاری ہے۔

الیکشن کمیشن آف پاکستان کے مطابق خیبرپختونخوا کے 17 اضلاع میں پولنگ صبح 9 سے شام 5 بجے تک بغیر کسی وقفے کے جاری رہے گی۔

صوبے کے17 اضلاع میں جنرل، خواتین کیلئے مخصوص نشستوں پر انتخابات ہورہے ہیں، جن میں 3 لاکھ 45 ہزار 604 ووٹرز حق رائے دہی استعمال کریں گے۔

الیکشن کمیشن کا کہنا ہے کہ انتخابات کے لئے حق رائے دہی استعمال کرنے والوں میں ایک لاکھ 85 ہزار 377 مرد ووٹرز شامل ہیں جبکہ ایک لاکھ 60 ہزار 227 خواتین ووٹرز شامل ہیں۔

الیکشن کمیشن نے مزید بتایا کہ ضمنی بلدیاتی انتخابات کیلئے 260 پولنگ اسٹیشنز قائم کیے گئے، جہاں سیکیورٹی کے سخت حفاظتی انتظامات ہیں۔

یاد رہے کہ پشاور، نوشہرہ، چارسدہ، صوابی، کوہاٹ، کرک میں انتخابات ہورہے ہیں جبکہ لکی مروت، سوات، ایبٹ آباد، ڈی آئی خان، ٹانک میں بھی ضمنی بلدیاتی انتخابات کے لئے پولنگ جاری ہے۔