کوئٹہ: بلوچستان کے ضلع مستونگ میں سول اسپتال چوک پر گرلز ہائی اسکول کے قریب بم دھماکہ ہوا جس میں اسکول کے بچوں سمیت 7 افراد جاں بحق اور 22 سے زائد زخمی ہوئے ہیں۔

پولیس کے مطابق مستونگ میں ہونے والے دھماکے میں جاں بحق افراد کی تعداد 7 ہو گئی، جن میں 5 بچے، ایک پولیس اہلکار اور ایک راہگیر شامل ہیں۔

پولیس نے بتایا کہ مستونگ دھماکے میں متعدد گاڑیوں اور رکشوں کو نقصان پہنچا جبکہ پولیس موبائل مکمل تباہ ہوگئی ہے۔

پولیس کے مطابق مستونگ دھماکے میں زیادہ اسکول جانے والے بچے زخمی ہوئے، زخمیوں کو ڈی ایچ کیو اسپتال منتقل کردیا گیا ہے۔

اسپتال ذرائع کا کہنا ہے کہ مستونگ کے اسپتال کو ڈاکٹروں اور سہولیات کی کمی کا سامنا ہے، دھماکے میں زخمی ہونے والے 13 افراد کو اسپتال منتقل کیے گئے ہیں۔

ترجمان سول اسپتال کے مطابق مستونگ دھماکے کے 5 زخمی سول اسپتال کوئٹہ منتقل کردیے گئے ہیں، ایک زخمی تشویشناک حالت میں لایا گیا ہے ۔

پولیس اور سیکیورٹی فورسز نے علاقے کو گھیرے میں لے لیا، جائے وقوعہ سے شواہد اکٹھے کیے جارہے ہیں۔

اس حوالے سے ایس ڈی پی او میاں داد عمرانی نے بتایا کہ مستونگ دھماکہ خیز مواد موٹرسائیکل میں نصب اور ریموٹ کنٹرول تھا۔

اسپتالوں میں ایمرجنسی نافذ

مستونگ دھماکے کے بعد کوئٹہ کے اسپتالوں میں ایمرجنسی نافذ کردی گئی ہے، سول اسپتال کوئٹہ، بی ایم سی اسپتال کوئٹہ اور ڈرامہ سینٹر میں ایمرجنسی نافذ کی گئی ہے۔

تمام ڈاکٹرز نرسز اور پیرامیڈیکل اسٹاف کو اسپتالوں میں طلب کر لیا گیا ہے۔

وزیر اعلیٰ بلوچستان کی مذمت

وزیر اعلیٰ بلوچستان میر سرفراز بگٹی نے مستونگ میں دھماکے کی مذمت کرتے ہوئے کہا کہ دہشت گردوں نے غریب مزدوروں کے ساتھ اب معصوم بچوں کو نشانہ بنایا، انسانیت سوز واقعہ قابل مذمت ہے۔

سرفراز بگٹی نے شہید پولیس اہلکار اور معصوم بچوں کے ورثاء سے افسوس کا اظہار کیا اور کہا کہ دہشت گردوں نے سافٹ ٹارگٹ میں اب معصوم بچوں کو نشانہ بنایا، معصوم بچوں اور بے گناہ افراد کے خون کا حساب لیں گے۔

انہوں نے کہا کہ شہری آبادی میں مقامی افراد کو بھی دہشت گردوں پر نظر رکھنی ہوگی، مل جل کر ہی دہشت گردی کے عفریت کا مقابلہ کیا جاسکتا ہے۔